Thutna tur neiloten kawng dang

Thutna tur neiloten kawng dang
Aizawl Municipal Corporation hriattirna tihchhuah bawhchhia in Venghlui leh Tuikual South huamchhunga kawngpui kama chawhmeh zuar thinte chuan June 21 – Inrinni khan an kawngpui kamah chawhmeh an zuar leha, AMC lam an chawhmeh an senghawi sak chu lungawiloin Aizawl Tennis Court bulah kawng an dang a, tlai lamah an inpho zui a ni.
Aizawl Municipal Corporation-in Aizawl veng hrang hranga kawngpui kama chawhmeh leh thildang zuarte tihtawp tuma a beih meknaa hma a lakna hmasa ber Tuikual South huamchhunga chawhmeh zuarte hian tun Inrinni khan an kawngpui kamah chawhmeh an zuar leh a, AMC-in thupek an chhuah tawh tlawhchhanin an chawhmeh an ruh sak hnu ah chawhmeh zuarte hian kawngpui an dang zui a, nilenga an dan hnu ah tlai lamah kawngkamah an inpho leh a ni.
Tuikual South leh Venghlui huamchhunga kawngkama chawhmeh zuar thinte hi AMC chuan AMC Multi Complex Tuikual South-ah a sawn a, hetah hian an len loh avangin kawnglama inpho tumte leh leh AMC hi an lo inbakkaih zauh zauh tawh a ni.
Hun engemawchen chu helai hmun kawngkamah hian chawhmeh zawrh a ni loa, kawngkama an inpho thin avanga lirthei one way pawh Traffic Police lamin zalen takin a tawn tawna tlan theihin an lo ti tawh a ni.
June 21 khan chawhmeh zuarte hian inpho an tum thar leh a, AMC hian an chawhmeh ruh sakin hma a la ve thung a. Chawhmeh zuarte hi kawngpui an dang zui a, Traffic Police pawhin kawng hi an khar a ni.
An sawi danin, a tam ber hi Aizawl chhehvela awm an ni a, loneitute atanga kharchhawng an awm nual bawk. Inrinni hi Aizawla an thil thar leh siam an zawrhna hun a ni a. AMC Multi Complex-ah hian an len ve loh avangin ni khat chauh chu phalsak turin an ngen tih an sawi a ni.