Tih dan tha entawn.. intihhmuh..

Serchhip Chhim Veng VCP PC Lalsiamliana chuan in chhung atanga kawta meizial bung paihtu a fapa chu cheng 20 a chawitir a, hemi chungchang hi tun hnai khan social media-ah a darh a.
Pawisa chawitir tura hriattirna lehkha pawh VCP fapa Tv Remsangliana hian a dawng thlap a. Lehkhaa a lan danah chuan, dan bawhchhiate hremna dan hi Gram Sabha (Chhung tin aiawh member kalkhawmte rorelna)-in a lo rel sa thlap tawh a ni.
He thil thleng hi thil ropui tak a ni. VCP hian, an in chhung atanga an kawt lama a fapain meizial bung a paih lai hi a hmu a, an in kawt mai a nih avangin VCP hian a fapa hi a hmun lova bawlhhlawh paih tawh lo tura hrilh pahin meizial bung chu chhar a, bawlhhlawh bawma paih turin a hrilh thei a ni. Mahse, chutianga ti ta mai lo chuan, tun hnu zel pawha a fapain dan a pawisak/zahna turin dan a kengkawh a, a fapa ber chungah pawh khauh taka dan a kenkawh chuan, midang chungah pawh khauh taka dan kenkawh a nuam dawn a ni.
Panchayati Raj system hnuaia Gram Sabha hi India ramah chuan, democracy lungphum innghahna pawimawh, a bulthut (grassroot level) kan tih hi a ni ber awm e.
Meizial bung chungchang hi Gram Sahba level-a thleng a ni a, hei hi thil lawmawm tak mai a ni a, a bulthut atanga a inrem dik theih chuan a chung lam pawh a inrem dik chho ang a, chu chuan rah tha tak a chhuah dawn tihna a ni.
Vaihhlo leh a kaihhnawih kapna dan COTPA 2003 pawh kha hun rei tak kan hmelhriat hnuah a practical-a hma lak a nih khan, example atan an han in man a, pawisa te an inchawitir a. Zawi zawiin an khauh chho zel a, a tawpah chuan hei, kan hmuh angin bus chhungah te, puipunna hmunah te, mi in chhungah te meizial kan zuk duh tak loh hi.
Thil tha tih entawn hi kan intihhmuh a pawimawh hle mai a. Thil thenkhatah chuan, thil tha miin an tihin, entawntu nih hi tlawmah kan la em maw ni tih turin kan awm thin niin a lang. Hei hi kan politics kal sualin a hrin chhuah pakhat a ni thei mai ang em? Sawrkar hmasain thil tha tak tih a tum a, entir nan kawlphetha siamna tur tuikhuah. An puitlin hmain sawrkar dang a lo piang a. Sawrkar thar chuan sawrkar hmasa thil tih, ram leh hnam tana chhenfakawm tak ni thei tur pawh, sawrkar hmasa hmingthatna tur nia a hriat tlat avangin a chhunzawm duh lo a. Chutiang bawkin hmasawnna ruhrel hrang hrangte pawh.
Hetiang hi kan kalphung a nih tlat avanga tun thlenga hmasawn thei lo, a khuh mawi nana ‘kum 20 chhung rambuai’ chhuanlama hmang chho vel ta mai mai hi kan ni mai awm e.
Gram Sabha level atanga thil thleng hi chhawm nung chho zel ila, entawn ila, intih hmuh chur chur ila, chung lam a kangkai zel ang a, meizial bung paih hi kan thatpui lel thei a nia!