Tih luat a hlauhawm…
Lianchhiari Zai-ah chuan, ‘Kan va tih luatah lengin ka zir sual e, ka pa van hnuai thang tur, a than ni bang kir e’ tih kan hmu a, a thawnthu chu Mizoten kan hre vek ang.
Nimin khan, phai lam political party zawmtu, Mizorama political party pahnih, AAP Mizoram leh BJP Mizoram te chu thisen chhuak khawpin an lo inbengberek deuh niawm tak a ni a. A hnuah thu leh hla an nei zui ve ve a, an tanhmun atang chuan thiam an inti ve ve awm e; mahse, ‘tih luat’ an nei ve ve niin a lang.
AAP Mizoram lam thahnem ngai lutukin, BJP Mizoram office tualah kher sit in demonstration neih an duh niawm tak a ni a. BJP Mizoram lam lahin an lo remti chiah lo a nih hmel a; eng tin emawa awki sang deuh chu a ki-in a daih seng ta lo niawm tak a ni.
Heng zawng zawng a thlen chhan, a kaikuang ber hi chu, PM Narendra Modi a ngawih rei lutuk vang a ni ber awm e. AAP Mizoram lamin PM Modi-a au eih turin BJP Mizoram an phut a, an phut danah erawh ‘tih luat’ a awm ta ni berin a lang a. BJP Mizoram lam pawh tharum nena lo dawngsawngtu nia puh an nih avangin, ‘tih luat’ an nei a tih ve theih bawk ang.
Nimin piaha thil thleng pakhat, MLA driver-in mi pakhat kut a thlak lai video a darh chiam bawk a. Kha thil thleng pawh kha ‘tih luat’ intawng an ni ve bawk awm e. Kha thil thleng khan politics huangah nghawng a nei nghal daih mai; ‘tih luat’ hi a hlauhawm dawn hle a ni.
Political party dang dangte pawh, inthlan hmachhawn mekah hian thahnemngaihna leh duhthawh luatah hian, ‘than ni bang kir’ khawpa ‘tih luat’ pumpelh tura tanlak a pawimawh dawn hle niin a lang bawk.
Inthlan hmain thla nga vel hun a la awm a, hemi hun chhung hian mipui hip tum lutukna lamah tan ulh te, ‘tih luat’ te a awl dawn hle a. Party hrang hrangin election field-ah ball (sawrkarna) changtu nih tumin an inkhel mek a, referee (mipui)-in ‘red card’ an phawrh khum nih a hlauhawm dawn hle. Tih luatah van hnuai thang tur hi a than ni a bang kir hlauh ang tih a hlauhawm a, party tin hian election field-ah hian ball changtu zawk ni tura tha an thawh kawngah free & fair takin khel vek teh se.