Tih tak zetin vote i thlak ang u…

Bible-a ‘verily verily’ tih ang deuh khan, ‘tih tak zetin’ vote i thlak ang u, tiin mipui kan insawm a. Vote thlak hi i la ‘serious’ ang u, tihna a ni.
Tih tak zet a nih chuan, rilru leh ngaihtuahna zawng zawng hmanga thil tih a kawk a, namnul mai loh tur, tihna a ni ber awm e.
Chutih rualin, ngun taka ngaihtuah vang vang hnu pawha thlan tur hriat miah loh tum, duhzawng neih loh tum a awm thei a, chutiang hunah pawh chuan, vote thlak hrim hrim hi sawrkar chuan a ngaih pawimawh avangin NOTA (Non of the above) ah tal thlak turin mipui a ngen a, NOTA hi ‘right of voter’ ah pawm thlap a ni bawk. Chumi awmzia chu, tih tak zeta ngaihtuah hnuah duhzawng thlan tur kan neih ngang loh pawhin, ‘vote ka thlak lo mai ang’ ti liam mai lova NOTA-ah tal vote thlak chu khua leh tui duty a la ni fan a, NOTA-a vote thlak pawh ‘tih tak zet’ a la ni tho a nih chu.
Vote thlak rau rauah, ‘namnul’ a awm leh a. Mahnia thutlukna thiang tak siam thei tura inthlan boruak ngaihsak mang lova midang ngaihdana innghat liam mai mai a awm theih a, chu chuan vote hlutna a tinep a, mahni hlutna kan tinep tihna te pawh a ni thei nghal awm e.
Mipuiin kan aiawha rorel tur kan thlan hian, ngaihtuah chiang mang lova vote thlak a nih chuan ram hruaitu tha vak lo thlanchhuah theih a ni a, tih tak zetna nen lova thiltih rah chhuah chu ram leh mipuiin an tuar duh viau zel.
Tunhma deuha inthlan boruak kha a nu viau thin nia sawi a ni a, ‘politics tui nu’ tih tawngkamte pawh a lo awm tawh a. Mipui tam tak ngaihdan pakhat chu, ‘inthlan vuakveta eng emaw therhlo/hamthatna kan lo hmuh ve hi kan hlawkpui vena a ni mai a…’ tih a ni thin a. Chutiang ngaihdan nei chunga vote kan lo thlak thin vang ni maw, kan ram inrelbawlna hi a fim vak lo tih a hriatna chu, eirukna a hluar dan atang hian a lang mai awm e. Hengte hi tih tak zetna nena vote kan thlak loh rah a ni thei zel a ni.
Tih tak zetna nena vote kan thlak chuan Chunglam pawhin mal a sawm ngeiin a rinawm. Vawiin vote thlak niah hian tih tak zetin vote i thlak theuh ang u.