TIME magazine chuan Taylor Swift 2023 Person of the Year-ah an puang a, an magazine cover-ah a thlalak chi thum an hmang a, a chhungah chipchiar ang reng taka an kawmna an dah tel bawk.
Swift, kum 33, hian interview hi a ngaina vak lo a, tun tuma TIME magazine in an kawmnaah erawh hi chuan a inphawrh ve nasa hle a, hemi chungchang Instagram-a a post-ah chuan, “Interview dawnah hian rinhlelhna hi ka nei deuh thin,” tiin TIME magazine cover pathum thlalak a post tel a. “Mahse, tun tuma kan ti hi chu ka lawm zawk khawp mai,” tiin amah kawmtu a fak hle a, “A bul hnaiah awm ve ula chu maw, mi thil chik mi, ngaihven peih, hlimawm leh mi tiphur thiam a ni tih inhre mai ang,” a ti.
TIME magazine-ah hian Stevie Nicks, Greta Gerwig, Shonda Thimes, Phoebe Bridgers leh milar dang dangin Swift fakna thu an sawi te an dah tel a, chung te chu lawmawm a tih thu a sawi bawk. Swift chuan, “Kumin hi ka thlir let a, hetiang lo thlen tirtu kum hmasa lam zawng zawng nen. Lawmthu ka sawi seng lo a ni ber e,” a ti bawk.
Beyonce nena an inkar te pawh te sawi chhuakin, Swift chuan Beyonce chu, “Mi hlu tawp khawk a ni mai, a inhawng a, a hlimawm bawk. Music-industry kalphung nawr danglam thei khawpa ropui a ni. Sumdawnna lama tihphung hman atanga lo hman reng tawh thlak dawrh thei tura artist-te zirtirtu a ni,” a ti.
Taylor Swift leh Beyonce te hi fans lamin an khaikhin fo a, kumina an tour neih, The Eras Tour leh Renaissance World Tour te pawhin khaikhinin, tu tour nge ropui zawk tih thuah inhnialna te pawh a tam a, mahse, Swift chuan hetianga khaikhin vel hi tha a tih loh thu sawiin, “Tun nipui chhung khan stadium tour a tam hle a, mahse, an khaikhin chu kei leh Beyonce kan ni. Hetianga media lama hmeichhe pahnih cho-tuah hi an hlawkpui a ni chek ang a,” a ti bawk.
TIME Person of the Year- Taylor Swift
Get real time updates directly on you device, subscribe now.