Tino manah Newcastle leh Southampton inrem

Khup hliam avanga season liamta pumpui deuh thaw inkhel thei lo Southampton right-back Tino Livramento chu chhawr theihin a dam chho leh ta a, Newcastle United chuan dawr nghalin, Livramento manah hian pound maktaduai 40 leh a behbawm (add-ons)-in inremna an siam thei ta tih BBC Radio Solent chuan a puang.
Kum 20 mi Tino hi kum 2021 khan England ram chhim lam tuifinriat kam khaw club chuan Chelsea atangin pound maktaduai 5 lekin an leichhuak a; season liamtaa a inkhelh mumal theih loh bakah a team behchhan Southampton chu Premier League atangin an tla a, Magpies an lo lang chhunzawm ta a ni.
England Under-21 defender hian April 2022 khan a khupah hliampui a tuar a, footballer-te’n hun rei tak an bawksawppui thin ‘anterior cruciate ligament injury’ an tih ang kha a nih avangin season liamta khan Southampton tan game hnih chiah a khel.
Chu pawh Southampton game hnuhnung pahniha Brighton leh Liverpool an sut tuma bench atanga a luh kha a ni.
2021-22 season kha chuan Livramento hian game 32 khel tlingin, chu’ng zinga match 28 chu Premier League a ni.
Tyneside club hian Tino mana inremna an peih hma tun nipui thawt lai vek hian Italy midfielder Sandro Tonali leh England winger Harvey Barnes an senglut fel tawh a; season liamtaa top-four dinhmun an luah atang khan Eddie Howe team hian hmasawn an tum niin a lang a; Premier League season thar bul an tannaah August ni 12 khian Aston Villa an mikhual ang.