Title 100 la tling Djokovic

Inrinni zan khan Geneva Open final khelh a ni a, inkhel hmuhnawm takah Novak Djokovic chuan pui zetin Hubert Hurkacz a lehthal. Geneva Open champion Djokovic title 100 a tla tling chiah a, Tennis huangah a lal ram a zau belh leh zual.
Title 100 la tling tura chak mamawh Djokovic hian vawi sarih an intum tawha ala hneh vek Hubert Hurkacz lakah bul a an ha lo. Set khatnaah game an inlak chhawk zak zak a, Hurkacz-a’n 6-5 a hma a hruai laiin Djokovic a chesual a, a serve a hum zo lo. Break pawimawh tak a neih vangin Poland player Hubert Hurkacz-a’n set khatna a la.
Hurkacz-a’n set khatna a lak hnuin Djokovic-an a huaisenzia a lantir nawn leh a, a khingpui a bei let na hle. Set hnihna leh set thumnaah an inhnehtawk hle a, tie-break khelh a ngai ve ve. Tie-break-ah hian Serbian pa huaisen Djokovic a chungnung ve ve a, a khingpui lakah 5-7, 7-6 (7-2) leh 7-6 (7-2) a hnehna changin hun rei tak a nghah tawh title 100 a lak tlinna ni ropui chu a nghakchhuak ta nge nge.
Grand Slam-ah vawi 24 champion tawha Tennis player ropui ber ni mek hian ningani khan a kum 38 tlin champha phak ropui takin a lawm a, zirtawp zan semi-final-ah hnehna changin final a lut a, inrinni zanah a champion zui leh. Nole hian title 99 lai la tling tawh mah se Paris Olympic a Gold medal a lak hnuin champion na a nei ta miah lova, title 100 a la hlawhchhuah thei rih lo zel. Hubert Hurkacz hnehin title 100 a la tling ta nge nge a ni. Open era-ah Jimmy Connors leh Roger Federer te chiah ATP title 100 la tling thei an ni reng hin a, player ropui bik huangah hming nemkai turin Djokovic hian title 100 la tling ta a ni.
Kum 38 mi Novak Djkovic hian Tennis huangah hnuhma ropui tak tak a lo hnutchhiah tawh. Grand Slam-ah vawi 24 champion tawhin mipa lama champion ngun ber a ni a. Hmeichhe lama champion ngun ber Margaret Court nen champion zat a intluk. Grand Slam-ah vawi 382 chak tawhin Grand Slam-a chak hnem ber a ni mek a. ATP Master Title 40 la tling thei awm chhun a nih bakah chawlhkar 428 zet World No. 1 niin World No. 1 ni rei ber a ni bawk. Mimal inelnaah a chet hat rualin ram inelnaah Serbia a chethatpui viau bawk a, Olympic Gold Medal a la hial tawh bawk. Djokovic hian Grand Slam 25 lak tlin tumin hma lam a pan mek a. Grand Slam 25 a la tling thei a nih chuan atan Tennis huangah thlakhlelh leh chuang tur dang a awm leh tawh dawn chuang lova, hahdam takin a chawlh zui rinna lian tak a