Title 100 lak tumnaa la beidawng lo Djokovic

Title 100 lak tumnaa la beidawng lo Djokovic

Pathianni Shanghai khawpuia ATP Masters 1000 event final-ah khan chak se world number one hlui Novak Djokovic chu title 100 la tling thei player pathumna ni mai tur a nih laiin Italy tlangval tha za rual lek Jannik Sinner hneh loin a tlawm leh ta rih a, inkhelh bana press conference a hmachhawnah Serb chuan title lak kawnga century siam turin a la beidawng lo tih a sawi.
24-times Grand Slam champion hi a tlakrualpui legend pahnih – Roger Federer leh Rafael Nadal baka ‘big four’ zinga mi Andy Murray tihte’n khaw dang an hawisan tawh hnuin khelmualah a la tui rih a, chawlh lam a la hawi lo a, tennis player piangchhuak tawh zawng zawng zinga grand slam title 25 la tling awmchhun nih tumin kum thar hian major tournament a la khelh chhunzawm ngei a rinawm a, mahse, a tha erawh a thum ve deuh tawh tih loh rual a ni lo a, hnahthar fit leh thahrui ngah zawk lo chhuak mek karah champion loh a inhmeh chho deuh deuh dawna a lan laiin ATP title 100 puitlin tura a hmachhawp erawh bansan a la tum lo tih a sawi.
Kumin August thla Paris Games-a Olympic gold medal a awrh bak kumina chetthat tluanchhuah harsat ve ta tlat Djokovic hian Flushing Meadows lamah lah khan third-round match pakhatah Alexei Popyrin tihte mai mai a hneh lo chho ve ta a; Shanghai khuaah ropui angreng takin a kir a, tournament chhung zawng nghet mar tha takin a khel a, a vawingana atan ATP Masters 1000 event final a lut a, 7-6(4), 6-3-in world number one Sinner lakah a tlawm a nih kha.
Chnchinbumite hmaah Serb chuan a eng lam zawnga thil a thlir zui zel thu sawi chungin a trophy cabinet-a singles title 100 khung tlin a la tum zui zel tur thu leh a la beidawn ikhaw loh thu a sawichhuak.
Tarlan tawh thin angin, Jimmy Connors (109) leh Roger Federer (103)-te chiah kha tennis chanchina title 100 la tling awmchhun an ni a, kum 37 mi ni ve tawh Djokovic hian mihuai kalhmasate hnung hi zui zo ve tak ang maw?
October ni 16-19 chhung awh tur Saudi Arabia khawpui Riyadh-a tennis exhibition ‘Six Kings Slam’ khelh chhoh leh mekah Djokovic hi a inlan chhunzawm a; he exhibition-ah hian tun season tawp ruala tennis inelna hmachhawn ve tawh tur Rafael Nadal bakah hming hraw dang – Sinner, Carlos Alcaraz, Daniil Medvedev leh Holger Rune-te an inlan ve bawk a ni.