Title humhim tura chak nghal Sabalenka

Title humhim tura chak nghal Sabalenka
Eng tournament-ah pawh defending champion nih hi phurrit a ni fo a, mahse, hmeichhe singles world number one Aryna Sabalenka chuan US Open title humhim tura a chetchhuah vawi khatnaah Pathianni khan harsatna lian tham tawk loin first round a paltlang a, inkhelh banah defending champion ni chunga inkhelh chu nuam a tih thu leh a tan chuan phurna siamsaktu a nih thu a sawi sam et!
Belarus nula hian a first round match-a Switzerland player hriat hlawh zau lutuk lo Rebeka Masarova hmachhawnin, set khatnaah an insualtawk viau a, set hnihna erawh Sabalenka chan niin, Billie Jean King National Tennis Centre, Flushing Meadows-a Arthur Ashe Stadium-ah 7-5, 6-1 hnehna a chang.
Major title pathum la tling ve tawh Sabalenka chuan inkhelh ban on-court interview-ah amah tantu mipuite chungah lawmthu sawiin, court chhung boruak pui a tihzia a tarlang tel a; hnehna a chang thei lawmawm a tih thu leh a game hmasa lama bul a tan fuh tawk loh thu sawiin, a hnua a game tluang pangngai a pawh leh theih tak thu a sawi a; nikum ang bawka champion leh ngei a duh thu a tarlang tel.
Vawiin second round inkhel pakhatah Belarusian hian Russian player Polina Kudermetova a tum leh dawn a, a hmachhawn tur chungchang sawiin, player tha tak a nih thu leh inbeihna hautak zet a nih tur thu a sawilawk.
Ni 15 chhung inkhelh tura a ni hmasaberah he hmuna kum 2021 champion lo ni ve tawh Emma Raducanu pawh a champion kum hnu lama Flushing Meadows-a a chak vawi khatna ni turin Japanese qualifier Ena Shibahara chu 6-1 6-2-in a sawp.
Tarlan tawh thin angin, kum li kalta khan Briton Raducanu hi qualifier ni chunga US Open champion hmasa ber a lo ni tawh a; kha mi hnu khan hliamin a tlakbuak chho ta reng a, Grand Slam tournament a hmachhawn theih hoah reng reng champion chu sawi loh a tla hma pawl a ni chho ta zat zat a; kumin hian Rafael Nadal-a coach hlui ruai chungin beiseina thar nen New York khuaah a inlan a, kum 2022 leh 2024-a first round paltlang zo lo khan second round a lut ta hial a; amah pawh a hlim a, kumin hi a tan a danglam hle tih a sawichhuak nghe nghe.
“Nitin hian ka chet dan a dik chho zel tih ka feel thei a, mahse, hlauhthawn hi a la awm lo thei lo a, vawiina chu hlauhthawnna ka paltlang thei chu ka hlim hle a ni,” a ti.
Canada player Leylah Fernandez pawhin a chipui Rebecca Marino hnehin second round a lut ve bawk.
Fernandez hi kum 2021 final-a Raducanu laka tlawm ta kha niin, kuminah chak chungin bul a tan a, 6-2, 6-1-in first round-a a tumpui Marino a hneh.
2023 Wimbledon champion Marketa Vondrousova pawh second round lut zingah telin, Oksana Selekhmeteva lakah 6-3, 7-6(3) hnehna a chang.
French Open winner hlui Jelena Ostapenko pawhin Chinese qualifier Wang Xiyu lakah harsatna a tawk lo a, 6-4, 6-3 hnehna nen round khatna a paltlang ve bawk.