Tlabungah doctor rual leh thawktu dangte an luanglut

Indian Medical Association Mizoram State Branch leh an thawhpui pawl hrang hrang chuan Zirtawpni khan Tlabungah Multi-Speciality Clinic an buatsaih a, mi 2668-in a thlawnin an hriselna an endik tir.
Sub-District Hospital Tlabung tualah a bul tannaah IMA Mizoram State Branch hruaitute chuan, Multi-Speciality Clinic hi damdawi in changtlung zawk pan ve thei lo thingtlang hmun kilkhawr zawk amite tan an buatsaih thin a, tum 12 hlawhtling takin an buatsaih tawh tih an sawi. Mizoram hmun hrang hrang atanga doctor leh thawktu dang kalkhawmte chu mahni intum chawp veka thawk chhuak an ni tih an sawi bawk.
Multi-Speciality Clinic hi IMA : Mizoram State Branch, Mizoram Government Doctors Association, Indian Dental Association leh ZMC Faculty Doctors Association bultuma neih a ni a. Tlabungah hian SDO (C) hoa din Core Committee-in a tul apiang an lo buaipui a, tun tumah hian doctor 56 leh anmahni puitu mi 17, an vaiin mi 73 thawk chhuakin, department 15-ah harsatna neite rawn theihin doctor an thu a ni.
Khaw 20 vel atangin mi 2668 vel an inentir a, inentirte hnena a thlawna damdawi sem tur leinan hian West Tuipui bialtu MLA Prova Chakma chuan MLA fund cheng nuai 2 a hlan bakah YMA Tlabung Branch pawhin thilpek lo hlanin, zanriah atana an chawhmeh tur sangha an pe a ni.