Tlabungah society-in petrol leh diesel chhek thei dawn

Tlabungah society-in petrol
leh diesel chhek thei dawn
District Cooperative Development Committee (DCDC) Lunglei chu addl DC Rochuangkimi Khenglawt kaihhruaiin Thawhlehni khan an thukhawm a. District chhunga cooperative society-te hamthatna leh hmasawnna tur hrang hrang an sawi ho.
Thutkhawma report danin, Tlabung Zodin MPACS Ltd chu petrol leh diesel phal chin chhek khawm phalna pek an ni a. Tlabung Zodin MPACS Ltd hi Mizoram Bana Kaih Scheme hnuaia hma lakpui tura thlan an ni bawk. Lunglei district-a registered cooperative society 216 chu National Cooperative Database (NCD) portal-ah chhinchhiah fel an ni tawh a, portal lama harsatna avangin society din tharte chu dah luh theih an nih tawh rih lo a ni.
Damdawi man tlawm (generic medicine) zawrhna, PM Janaushadi Kendra chu Mizorama M-PACS zingah Lunglei district-a Leitlangpui M-PACS chauhin an la kalpui tih sawi a ni a. M-PACS dangte tana kalpui theih dan tur sawiho a ni.
Cooperation department atangin DCO tinin National Livestock Mission (NLM) leh Rashtriya Krishi Vikas Yojana (RKVY) hnuaia hma lakpui tur cooperative society pakhat ve ve thlang theuh tura tih a nih angin, NLM atan Zobawk South Poultry Cooperative Society Ltd leh RKVY atan Mausen Banana Growers Cooperative Society Ltd thlan an ni tih sawi a ni bawk.