Tlangpanga cheese lum inumsiak

Tlangpanga cheese lum inumsiak
Intihsiakna hautak, intihnat palh pawh awl tak tur a ni a, mahse, nuam an ti tlat. Nat palh pawh an pawi sa lo! Tlangpang awih takah cheese mum an lum a, chu chu an inumsiak ta thin a ni. Double Gloucester cheese, kg 3.600g vela rit, motor ke ang deuha bial chu Cooper’s Hill, Gloucestershire-a tlangpang awih tak maiah chuan an lum a, chu chu a man hmasa ber nih tumin an um ta thin a ni.
Tlangpang hi a awih viau mai a, an inpal tlu nawk nawk a, an lum a, an tawlh thlu zawt zawt a, an inbin chhuk nawk nawk a, mawng sawh dawp dawpin an tawlh thlu zawt zawt a, mahse, an pawiti chuang lo, cheese rim na ve tak mai, Double Gloucester chu a dawngtu nih tumin theih tawp an chhuah tawh mai thin a ni. An intihsiak lai hi tlir mipui tam tak an pungkhawm bawk thin.
Hetiang intihsiakna hi kumtin an nei thin a, kumin hian Munich khawchhuak, YouTuber Tom Kopke chu mipa lam intihsiakna hmasa ber winner a ni a. Ani hi nikumah pawh winner a lo ni tawh a, “Kumin hi a danglam khawp mai. Nikum kha chuan a diak kawi deuh a, kumin erawh a khawro riau a, inhliam palh pawh a awl lehzual. Intihpalh theih a nihna te ngaihtuah duh miah loin, ka title hum ngei tumin nunna thapin kan bei a ni ber e,” a ti.
Cheese an inumsiakna tlangpang awih tak hi meter 182 vela thui a ni a, intihsiaknaah hian khawvel ram hrang hrang atangin an tel a, kumin hian hmeichhe lamah Ava Sender Logan, kum 20, chu winner a ni bawk.