Tlangzarh nia a tluk hnuah N Korea-in lawng tlangzarh leh
Tlangzarh nia a tluk hnuah N Korea-in lawng tlangzarh leh
Chawlhkar hnih liam taa an tlangzarh dawnah an beisei lawk loh tak chhiatna thlena an hruaitu, Kim Jong Un-a pawh a thinrim hle hnuah North Korea chuan an indo lawng thar an tichhuak ta.
Tonne 5,000-a rit destroyer hi kar tirah khan a tlukna hmunah kai thovin Ningani khan tlangzarh a ni ta a, tunah chuan a nih dan pangngai tur a ni ta niin sorkar news agency KCNA chuan a tar lang.
Lawng hi tun thlaa rorel lai party thutkhawm hmain an siam tha dawn niin KCNA chuan a tar lang bawk.
Tlangzarh tum hmasak khan Kim-a telin chhiatna a thleng ta a, nasa taka sawiselin ‘pawikhawihna’ tia sawiin an ram ‘ropuina leh inchhuanna a tichhia’ niin a sawi bawk.
‘Fimkhur lohna thil lian tak, mawhphurhna hlen loh leh scientific taka chet lak lohna’ tiin a sawi bawk.
Kha chhiatna thlengah khan thuneitu pali vel man an ni a, an zingah hian rorel lai, Workers’ Party-a Munitions Industry Department Deputy Director Ri Hyong-son pawh a tel.
Ri-a hi an Korean People’s Army kaihruaitu leh North Korea-in sipai lama hmalakna a neih hrang hrang enpuia viltu, an party-a Central Military Commission-a tel a ni.
Hotu lian mante hian eng ang hremna nge an tawh dawn hriat a ni lo va; mahse, mi pakhatin thuneihna sang tak a channa ramah hian thil ti dik lo hotu sangte hi hna thawh luihtir emaw, thihna thleng emawa hrem thin an ni.
US-a Johns Hopkins University-a US-Korea Institute-in an enkawl website, 38 North chuan lawng tlangzarha tuipuia chhuah tur kha mihring hmanga tih tum niin an tar lang.
Thlalem atanga thlalakah chuan a tluk hnuah khan mihring hmang vekin hrui leh balloon hmanga kaihthawh tuma beih a ni tih a lang a, an kaih thawh hnuah pawh balloon thenkhat chu lawngah hian a la bet fur niin an sawi.
Lawng tlangzarh tumin chhiatna a tawh hma lawk chawlhkar tam liam lovah khan Pyongyang hian hetiang indo lawng tho hi an ram chhung hmun dangah an lo tlangzarh tawh bawk.
Kim-a chuan he lawng hi North Korea-a lawng sipaite thuam tunlaina tur bul tanna nia sawiin nakumah sipai hman tura tih a ni dawn tih a sawi nghe nghe.