Tlawng lui nut chhan

Nimin khan PHE minister hovin tun hnaia Tlawng lui nu vak chungchang sawiho a ni a.
|hal laiin tui a tlem a, pump tur a awm mang lova, kan buai a. Ruah a sur a, tui a tam a, mahse tui nu avangin pump theih loh a ni leh thung a. Tui a tlem pawhin, a tam pawhin kan buai tho a.
Tunhma pawh khan ruah a surin lui tui hi chu a nu thin a, mahse pump theih loh khawpa nu nasa a ni ngai meuh lo. Tun hnu, hmasawnna lam hawi eng eng emaw construction a lo pun tak hnu hian kan lui lui te hi a nu bik ta em em tlat mai, ‘tui nut chhan’ hi chu sawi tam ngai lovin, construction leivung paih dan dik loh vangah puh a nuam ber ang.
Tui nut chhan kan hre si a, enga tinge kan dan theih loh?
Kawng laihna leivung te, construction dang leivungte hi luiah a lut nasa tih hriat a nih chuan, Mizoram chhunga project hna kal lai hi hriat vek a ni a, chung zinga tute emaw ber chuan a nihna tur angin leivung paih lovin, khawi lai ruamah emaw an paih a, chu chu ruah a lo sur hunah tuihawkin luipuiah a rawn len lut thin tih pawh kan hre vek bawk a. Thil thlen dan hre kur chung si leh hmu reng chung siin kan dang thei lo a ni ber awm e.
Dawhkan kil kuala sawiho hi chu kan peih, a thawhchhuah lam hi kan peih zui rei ta lo thin em ni aw a tih theih. Tuna lui tui tinutu hi leivung paih dan dik loh vang nia kan puh chuan, tute nge leivung paih thin, tih hi zawn chhuah a, enzui harsa pawh a ni hran lo; eng level vel emaw committee din avanga reh duak tur pawh niin a lang lem lo.
Hetih rual hian, mipui lam pawhin sawrkar hmalakna kan tawiawm thiam a pawimawh hle. A paihna tur hmun ni lova leivung or bawlhhlawh paih an awmin, thlir liam mai lovin thuneitute hnenah report thuai thin ila, chutianga kan tanrual phawt chuan dik lo taka thil ti thinte hi an tawmim ngeiin a rinawm. Sawrkar lam pawhin, dan bawhchhetute report-na tur hi zau zawkin tlangzarh ve bawk se.