Tlawng lui tui khuap lailawk

Tlawng lui tui khuap lailawk
Aizawl chawmtu tui lakna Tlawng Reiek Kaia tui kam khuahna ‘temporary barrage’ siam mek chu Nilaini zing khan a hmunah PHE minister Prof. Lalnilawma chuan a enfiah a. Aizawl West III bialtu MLA VL Zaithanzama leh department hotuten an tawiawm.
Tlawng lui hi a kum tela a kam zel avangin kum 2022 atang khan thal intan tak tak hma in tui khuahna atan temporary barrage siam kumtin a ni a, metre 2.5 a sanga siam thin niin, hei hian metre 350 vel tui tling tura beisei a ni.
Minister hian PHED hotute chu hmalakna leh ruahmanna dang awmte a sawipui a. Tui supply lama hmasawnna tura ruahmanna hrang hrang ngaihtuah chungin chak taka hma lak zel a nih tur thu a sawi.
2021 April 9 khan Greater Aizawl Water Supply Scheme Phase-I leh Phase-II atang hian Aizawl khawpui chawm turin nitin tui litre maktaduai (MLD) 38 mamawh a nih laiin, MLD 31.461 chiah a luang tawh a. Hemi hnu atang hian kawng hrang hrangin hma lak a ni ta a ni. Temporary barrage siam hian thal khaw ro tak tak lai kar khat vel tla tur tui a khawl thei thin a. PHED lamin an tehna atang chuan kumin hi Tlawng lui tui a la tlem ber tum ni tura ngaih a ni.