Tlawng nut vangin harsatna la tawk reng
Aizawl mipuite tui tlan Tlawng a nu a, mipui hnena tui sem kawngah tui nut vang hian PHE department-in harsatna an la tawk reng.
Tlawng nut thu hi thu thar pawh a tling meuh tawh lo a, tun hnaiah a nu fo. Remal cyclone vanga tui nu vak vanga harsatna kha a la awm reng bawk.
September ni 25 khan ruah tam tham tak a sur a, Tlawng a nu nghal. PHE department-in mipui hnena sem tur an han pump a, NTU 1000 chuang a ni.
Tui fim lam tehna hi NTU (Nephelometric Turbidity Unit) an ti a, PHE department khawl hian NTU 1000 thleng a teh thei. September ni 2 khan NTU 1000 a pel a, khawlin a teh pha lo. September ni 25-ah pawh khawlin a teh pha lo leh.
PHE department hian tui hi NUT 5 hnuai lam a nihin mipui sem tlakah an ngai a, tui a nu deuh a nih pawhin NTU 5 hnuaia a awm theih nan bawlhlo hmangin an tifim thin. A nut viau chuan a tihfim hi a hautak thin a, hun a duh rei, bawlhlo a heh, khawlin a tuar an ti.
Sem a ngaih miau avangin tui nu fe fe an tifim thin a, mahse a nu lutuk hi chu tihfim chi a ni lo e tiin a fim hun an nghak thin. Chu chuan tui sem a nghawng leh thin.
PHE department hotute chuan NUT 1000 chuang hi chu tui pawh a ni lo a, chirh luang a ni ber e, an ti a, tihfim rual a ni lo an ti.
September ni 27, Ningani tlai pawh khan tui an han pump a, tui ni lovin chirh an pump chhuak ta nghek mai!
Tui pump-tute’n Tlawng lui kama tui pump vel nana in an sak jackwell vel hi May ni 28-a remal cyclone leh ruahpui a thawh khan tuiin a chim a, khawl a tihchhiat nasat bakah chirh a hnutchhiat nghek bawk. PHE department hotute sawi danin, chirh hi engemaw zat chu an thian tawh a, mahse a vaia tifai tur chuan chawlhkar khat vel tui pump lova chawlh a ngai dawn. Chu chu thil tih chi a ni si lo a, chirh engemaw zat a la awm chungin an hna hi an chhunzawm a, Ningani tlaia chirh an pump chhuah pawh kha chutianga chirh chambang chu a ni.
Chirh an pump chhuah hian khawl an tithi nghal a, chirh an thian leh rih. Khawl leh pipe an thuah bawk.
PHE department hotute chuan kum hmasa lamah pawh Tlawng hi a nu fo a, mahse kumina a nu hi chu a nghet a, remal cyclone tleh hnuah phei kha chuan a nu deuh reng tia sawi theih a ni a, NTU 1000 a pel fo an ti.