TNT hmachhawn tura tlang Hunthar

TNT hmachhawn tura tlang Hunthar
Semi-final lama harsatna an tawh thin sukiangin Nilaini zan Tata SK 712 Pro Volleyball League-ah Huntharin 3-0-in Chhinga Veng Spikers an hneh a, kum nga hnuah final lutin, zanin hian Thutak Nunpuitu Team nen final an khel ang.
R. Dengthuama Indoor Stadium, Mualpuiah Chhinga Veng hneh nawnin, a hma aia hriam leh felfai zawkin inkhel an thunun a, 25-23, 25-20, 25-21-a an chak rualin championship kal meka set hloh loa Hunthar chak hmasak ber a ni nghal.
Gagandeep Singh chuan team a fuihphur a, vawi 21 vaw tlain tum sarih tisual mah se D3 Business Player of the Match-a thlan a ni a; Laldensanga’n point hloh mang loin tum kua a hlap tla a, hliam tihbuai lohin Zomuansanga’n rin ngamin a khel a, point 11 a thawh.
June ni 22 khan league kharnaah tlang chiang sa tawh ve ve chungin an intawng a, 3-2-in Hunthar chak laiin hliam laka an fihlim theihna’n Chhinga Vengin an player thenkhat tan hahchawlhna hun an siamsak.
Hunthar coach VL Malsawma Renthlei chuan semi-final an khelh hmain anni aia team tha Spikers an hneh nawn a nih chuan a tha thei ang bera khelh an mamawh tih a sawi a, an player-te chet danin team hruaitute duhkhawp a pe a, veng mipui a tihlim.
Kum 2017 leh 2018-ah kum zawnin Hunthar an champion a, vawi khat aia tam trophy la thei awmchhun la ni reng mah se kum 2019 semi-final stage-ah an tla a, league-a chak fai vek chungin nikumah hrilhhai takin final an thleng pha lo zui leh.
Tunah erawh inpumkhatna hmanga fei leh tlo taka an khelh tawh thin dan nei thar chungin final an khel thei dawn. Zirtawpni zanah league-a an ngam loh TNT lakah an tlawmna an chhanglet a nih chuan trophy pathum nena kum an khar dawn bakah, a vawithumna’n an champion ang.
Kum 2019 champion Chhinga Veng tan Javed Khan chuan tum 26 hlap thlain vawi sarih a hloh a, point hmu tam ber ni mah se thiamna pawimawh dangah a elpui Gagan chuan team tan a thawhhlawk zawk.
Lalbiakmuana’n tum li tisualin point 11 a thawh a, team nawr kal turin hnuhma a nei lian tawk lo. Inelna sangah K. Lalfakawma a talbuai a, tum thum a vuak tlak aia tam point a hloh a, Javed tih loh Spikers tan Mizo player-te’n chetthat hunah harsatna an tawk.
A tir set hnihah inhnehtawk takin ball an invuak tlak chhawk zak zak a; mahse, a tawp lam hun pawimawhah Huntharin danglamna thlenin an nghet zawk zel. Set thumnaah kirleh mamawh Spikers an hnungtawlh a, insiamrem thei tawh loin an bet tluan.
Set hmasa berah 21-21 a nih laiin Lalramnunfela’n rang takin Remsang-zuala’n kang sang loa a siamsak a vaw tla a, Javed-a’n Gagan-a service a lak fuh tawk loh nangchingin a hlap tla zui leh nghal bawk.
An inkhelh chhungin lehlam vuak dang tura net bula Huntharin an chhawr rim Rama’n vawi li chauh a vaw tla na a, set hmasa ber an lak theihna’n a tangkai. Chhinga Veng tan Biak-muana leh Javed chuan vaw tla ve leh hman mah se Zomuana leh Densanga’n set la zawk an ching fel.
Set hnihnaah Huntharin 17-17 a nih hnuah an kalsan leh. Biakmuana’n line pawnah vawchhuakin Javed chuan a service thui bawk a, 24-20-a nih laiin Gagan chuan a hlap a, PC Lallianmawia’n dang lut zo loin Hunthar an tlang.
Tlak hlauhawmah Chhing-a Veng an awm zui a, ho taka point an hloh rualin 7-5-in Hunthar an sang. Coach Jesse Lalpianpuia’n setter David Lalramhmachhuana’n lachhuakin H. Lalruatsanga a luhtir a, beisei ang thil a thlen chuan loh avangin reilote hnuah a thlaklet leh.
Huntharin team boruak siamtha telh telhin, Densanga’n a hui tlak rualin 15-10-in an sang. Spikers rinrawl Javed tlahniamin court pawnah a hlapchhuak a, 18-12-in lehlamin an kal falsan.
Boruak rit leh khirh hnuaiah Biak-muana’n point thum a hmu zawn a, Zomuana’n tum hnih tisual zawn ve thungin, Chhinga Vengin 21-20-in an hnaih hman a, kawng khar phui vek a la ni bik lo.
Mahse, Khawhai tlangval Zomuana’n a inrintawkna hloh duh lovin 23-20-a hma an hruai nan a vaw tla a, lehlam tan engkim a harsa tawh. Amah vek hian Hunthar point hnuhnung pahnih thawkchhuakin a hlap tlak hnuah a service a, Chhinga Veng player-te’n la loin an en tla a ni.
Nizan hmeichhe final result tarlan hman lohah Luangmual leh Kanan intumin, zanin dar 8 atang hian a hmun ngai Mual-puiah Thutak Nunpuitu Team leh Huntharin mipa final an khel ve leh dawn a ni.