Top 10-ah quiz-a tel zirlai lan tam vangin MZP lawm
Top 10-ah quiz-a tel zirlai
lan tam vangin MZP lawm
High School Leaving Certificate (HSLC) 2025 result chhuakah Inter High School Quiz 2024-a tel zirlai zingah top-10 a tling an awm nual avangin Mizo Zirlai Pawl chuan lawmawm a tih thu a sawi.
MZP Gen. Hqrs. thuchhuak chuan, MBSE-in hun reilote chhunga HSLC 2025 result felfai tak a tichhuak thei chu lawmawm a tih thu a sawi a. Kum 2024 HSLC result pass percentage 73.37% aiin kumina exam-a pass percentage 76.68% a ni chu hmasawnna nasa takah a ngai tih a sawi.
Zirlai hlawhtlinna changte a lawmpui rualin, compartmental chance nei zirlai 64 pawh nasa zawka inbuatsaih chhunzawm turin a ngen tih a sawi a. Hlawhtlinna chang zo ve ta lo zirlai 4355 te a tawrhpui thu leh a lehpekah hlawhtlinna chan ngei tuma bei turin a fuih thu a sawi bawk.
MZP chuan kum 1995 atanga kumtin a lo tih thin angin, HSLC top 10-a Mizo tlingte a chhuan zia leh duhsak zia lantirnan leh Mizo zirlaite inkarah inelna thianghlim a awm theihnan kumin May 7 hian HSLC top10-a Mizo tlingte chawimawina a buatsaih leh dawn tih a sawi a ni.