Top 4 huangah Chelsea an kir

February 25, 2024 Thawhlehni zan khan English Premier League 2024-25 khelh chhunzawm a ni a. Stamford Bridge-a an mikhual Southampton laka chang Chelsea chu top 4 huangah an kir. Thawhleh zana inkhel dangah Brighton in hnehna an chang ve bawk.
Top 4 huangah kir leh thei tura chak mamawh Chelsea hian an mualah tbla mawngphaha awm, tlahniam ngei tura ngaih Southampton an mikhual a. Table hnuai bera awm Saints lakah an khel Tha viau a, si li fai ngawtin hnehna an chang a. Top 4 huang luah let tura an mamawh point an thawkchhuak.
Inkhel thunun hneh viau mah se Chelsea hian beisei angin goal an thun hma bik lo. Minute 24-naah Christopher Nkunku chuan hmahruaina goal a thun a. Nkunku goal thun hnuin a khat mawi tawkin goal an thun ta thung. Hmahruaina goal an thun hnu hian minute 36-naah Pedro Neto chuan an goal hnihna thunin an hmahruaina a tizau a. Chawlhlawk dawn hnaih minute 44-naah Levi Colwill chuan an goal thumna a thun zui leh a, 3-0 a hmahruai chungin chawlhlawk an hmang.
Chawlhlawk hnu lamah Chelsea an khel Tha chhunzawm a, him beisei tura point mamawh Southampton in hlauhawm an siam hleithei meuh lo. Si thum fai ngawta hmahruai tawh Blues tan hian defender khel Tha tak Marc Cucurella chuan minute 78-naah an goal lina a thun a, an chakna a nem nghet. Cucurella goal thun hnu hian hun tawp thlengin goal dang a luh belh thei tawh lova, Chelsea chuan an mualah hnehna changin point thum an hmu.
An mualah an chak vangin Chelsea hi top 4 huangah an kir a, mah se an dinhmun a him lo viau thung. Nizan khan an lehpelh tak Manchester City leh Newcastle United ten inkhel an hmachhawn a. Tu zawk zawk pawh hi an chak a nih chuan Chelsea hi top 4 huang aTanga nekchhuahin an awm zui leh dawn. Chelsea in hma lam an pan hret laiin Southampton erawh chuan table hnuai ber an luaha nghet deuh deuh zel a, championship lama tlakhniam an hnaih deuh deuh zel thung.
Thawhleh zana inkhel dangah Brighton & Hove Albion chuan an mikhual AFC Bournemouth an hneh a, hma lam an pan hret. Brighton tan hian João Pedro chuan minute 12-na lekah penalty aTangin hmahruaina goal a thun a. Mikhual team tan Justin Kluivert-an minute 61-naa an si phurh a sut hnuin mualneitu tan hian Danny Welbeck chuan minute 75-naah hma an hruai nawn lehna goal a thun a, an mualah hnehna changin point thum an hmu zui ta a ni.
An mualah Brighton in hnehna an chan laiin Aston Villa chu an lenluhna mual Selhurst Park an 4-1 ngawtin an tlawm ve thung.
Mualneitu Crystal Palace tan hian Ismaïla Sarr chuan goal hnih a thun a, Jean-Philippe Mateta leh Eddie Nketiah ten goal khat ve ve an thun a. Villa goal hi neihchhun hi Morgan Rogers thun a ni.