Tornado-in US a nuaiah mi 25 vel thi
Tornado-in US a nuaiah mi 25 vel thi
Tornado-in US-a state pahnih a nuaiah mi 25 vel thi awmin mi eng emaw zatin hliam an tuar bawk.
Kentucky-a thuneitute chuan an state-ah mi 18 thi an awm thu an puang a, Missouri-ah mi pasarih an thi bawk a, an zinga panga hi St Louis khawpuia mi a ni.
Kentucky tornado hian state chhimchhak lama Laurel County chu Inrinni khaw var hma khan a nuai a, thuneitute chuan thi zat hi an pun an rin thu an sawi.
Missouri thuneitute chuan in 5,000 chhia a awm niin an sawi a, thenkhat chu in chung hawkte an nih thu power line tam tak a chhia niin an sawi.
Inrinni chawhnu (India-a zan lai) vel thleng khan Missouri leh Kentucky-ah hian hmun 1,40,000 chuangin power an la nei thei lo tih an sawi a. St Louis-a thuneitute chuan chhiatna thlen nasatna laiah chuan fire department-in in tin lutin an dap tih an sawi.
St Louis Mayor Cara Spencer chuan mi 38 hliam an awm thu sawiin a tam ber hi in chhia leh thing tluin a delh niin a sawi.
Kentucky thuneitute chuan mi tam tak hliam an awm niin a sawi a. “Chhiatna thlennaah hian mi zawn hna la thawh mek zel a ni,” tiin Laurel County Sheriff John Root chuan social media-ah a tar lang.
National Weather Service chuan tornado hian Missouri chu chawhnu dar 02:30 velah khawpui khawthlang lama Forest Park bul, St Louis Zoo leh 1904 Olympic Games nghahna vel a thleng dawn tih an sawi lawk.
St Louis Fire Department chuan a bul lawka Centennial Christian Church chimah mi pathum an chhanchhuak a, pakhat a thi a awm bawk tih an sawi.
Inrinni zan dar 09:00 atanga Pathianni zing dar 06:00 thleng chhiatna thlen nasatna hmun hnihah curfew puan nghal a ni a, hei hi thil chim velin mi a hliam lohna tur leh thil ruk a awm loh nana tih a ni.
US National Weather Service chuan tornado hian an thenawm, Illinois pawh nuaiin khaw awm dan uchuak tak hian khawchhak lama Atlantic vaukam thleng a tuam thu an sawi a. Inrinni khan Texas hmar lam chu la nuai thei niin an sawi lawk bawk.
US-a tornado tuar nasa thin lai bik hi ‘Tornado Alley’ an ti a. May leh June-ah a thawk tlangpui a, hun danga thawk pawh a awm thin.
Kum 2000 hnuah Kentucky hian kum tin May thlaa vawi nga vel tuar ang a ni a, Missouri-ah phei chuan vawi 16 thawk ziah ang a ni.