Tottenham in Newcastle an chelh

Thawhleh zana English Premier League khelhah tlawm mai tura ngaih Tottenham Hotspurs in Newcastle United an draw a, pui khat hlu tak an hmu. An mualah an chak zawh leh tak loh vangin Newcastle United manager Thomas Frank dinhmun a derthawnf thar leh zual. Inkhel dangah Everton in hnehna an chang ve thung.
Season kal mekah beisei anga khel tha tluang thei lo Newcastle hian St James Park-a an mikhual Tottenham lakah an khel chhe hran lova, tum hnih ngawt hmahruaitu an ni. An mualah chak teuh viau mah se hun pek belh tawp dawn hnaiha Cristian Romero goal ropui vangin uiawm takin an chak zo lo.
St James Park-a inkhel hmuhnawm takah hian goal a lut har viau a, team hnihin an hun tha neih an hlah ve ve. Goal lut a awm theih loh reng hnuin mualneitu Newcstle in goal an thun ta nge nge a, minute 71-naa Bruno Guimarães goal thun hmangin hma an hruai.
Hmahruaina goal an thun vangin phur viau mah se Magpies an phur rei thei bik lo. Tunhnaia tlawm zawn deuh tlut tlut Tottenham tan hian Cristian Romero chuan minute 78-naah goal thunin an si phurh a sut.
Goal khat ve ve an thun hnuin inkhel a hmuhnawm chhunzawm viau a, goal thun tumin an innawr tawn nasa hle. Na taka an khingpuite an nawr rah an seng a, Newcastle in penalty an hmu. Penalty hi Anthony Gordon chuan minute 86-naah a pet goal a, hma an hruai nawn lehna goal a thun. Hun tawp dawn tepah goal an thun nawn leh vangin Magpies hi chak ngei turah an inngai tawh. Hun pangngai tawp thlengin an hmahruaina an venghim a, hun pek belhah pawh an him tluan leh teuh viau bawk.
Dinhmun chhe taka ding tawh Spurs hian hun pek belh tawp dawn tepah corner an hmu. Corner atanga ball kal hi defender Cristian Romero chuan fuh zetin a bin a, bin na viau lo mah se a karawl laiah tlangin minute 90+5-ah goal thunin an si phurh a sut a, an team tlawm turin pui zetin a chhanhim.
Thawhleh zana inkhel dangah Everton chuan mikhual an nihna hmun; Vitality Stadium-ah minute 78-naa Jack Grealish goal thun hmangin mualneitu AFC Bournemouth chu 1-0 in an hneh a, point thum an hmu.