Tourism hmasawnna atan Synod inhawng
Tourism hmasawnna atan Synod inhawng
Mizoram Synod hruaitute chuan khualzin tam zawk hipna kawngah leh Kristianna leh Mizo nunzia lo pho lanna kawngah sawrkar thawhpui turin an inhawng tih an sawi.
Tourism minister Lalnghinglova Hmar leh department hotu dangte leh Mizoram Synod puipate chu Thawhlehni khan an inkawm a, Mizoram tlawhtu tourist pung zel lo dawnsawn kawnga thawhho dan tur an sawiho.
Mizoram tlawhtu pung zel chu thil lawmawm tak a nih rualin, fimkhur taka lo dawnsawn a tul tih Tourism minister hian sawiin, “Tourist-te hi lo kal belh zel se kan duh rualin, mi chi hrang hrang lo lut hian thil tha lo ken tel a nei thei a, chu’ng laka lo inven leh dawnsawn kawngah nasa taka inzirtir a ngai,” a ti a. Mizoram pawn atanga lo kalte zingah a tam ber chu ring lo mi an nih angin, biak in chhung leh a chhehvela awm dan mawi inzirtir a ngai, tiin, kohhran hruaitute tan pawh ringlote hnena rawngbawlna hun tha a inhawng thei tih a sawi a ni.
Mizoram Synod aiawhte chuan tourism-a hmalakna langsar tak awm mek chu lawmawm an tih thu an sawi a. Hnamdang min tlawhtuten nuam ti tak si, kan chenhona leh khawtlang nun zah tak sia hun an hman theihnan sawrkarin ruahmanna mumal tak a neih a tul tih an sawi a. Kan ram mawina leh khawtlang nuam tak kan neih – hmeichhiate tana him, traffic dan zawm tha adt. chu Kristianna vanga kan neih a ni tih tarlan a pawimawh an tih thu an sawi.
Tourism minister ho hian Council of Churches in Mizoram leh Tourism department aiawhte chu kumin January 20 khan Mizoram tourism chungchang thlirhoin an lo inkawm tawh a. Kohhran dang leh NGO dangte nen pawh inrawnkhawm zel tum a ni.
Inkawmhonaah hian:
8 Thlasik boruak nuam leh Krismas bawr, tourist tam zual lai chu a hlimhlawp lam bakah Chanchin Tha hrilhna remchanga hman theih tha tih a ni.
8 Mizoram sawrkarin CAN (Culture, Adventure leh Nature) lam hawiin tourism a kalpui mek thu leh, a bikin ‘cultural tourism’ ah Mizo culture leh Kristianna langsar zawka tarlan kawnga thawhho theih dan sawiho a ni.
8 Tourist-ten awlsam taka an chhiar theih turin Mizoram an cham chhunga hriat tur pawimawh hrang hrang ziaka thehdarh tha tih a ni bawk.
8 Mizoram tourism-in hma a sawn theihnan kohhran a inhawng a, an tangkai theihna leh sawrkarin a mamawhna zawnah thawhho an duh tih Mizoram Synod aiawhte hian an sawi.
8 Sawrkarin kohhran hmalakna tura a beisei hrang hrang chu inthlahrung loa hrilh thin turin Synod hruaitute hian Tourism department hotute an sawm a ni.