Tourism Potential

Winter festival 2024 nimina AR Lammuala hawngtu tourism minister chuan, Mizoram chu India ram state dangte nena khaikhin pawhin tourism sector-a theihna leh remchanna ngah ber pawl a ni, tiin a sawi a.
Hei hi tunhma kum tam tak kalta atanga ram hruaituten an sawi thin a ni. Budget session-ah tourism demand sawiho a nih apiangin Mizoramin tourism lama ‘potential’ a neih that dan chu House Member-ten an sawi thei vek a. State dangten an state economy chawikangtu atana tourism sector an hman tawh dante pawh an sawi thei hlawm bawk. Chutih rualin, department 40 chuang zingah tourism demand chu a mawngphah lama dah a ni zel thung.
India ram lailum lam state-te nen chuan kan inkhaikhin pha hauh lo ang a, mahse kan dep lawka awm hmarchhak state pariatte nena han inkhaikhin pawh hian, state dang tourism potential nei tha lo zawk anga ngaihte ai hian kan che ropui lo zawk niin a ngaih theih awm e. Sawrkar laipuiin state tinte, Central funding hmangin, tourism promote nan phuahchawp kut siam tura thurawn a pek dungzuiin keini state pawhin Anthurium festival, Thalfavang kut leh winter festival kan lo huaihawt ve thin a; heng festival-te hian khualzinmite a hip lut ruih ruih tawh em? Khualzinmite atangin kan state-in hlawkna engzat nge a tel thin, tih hi chhut ta ila, sawi tur a la beitham hle awm e.
State dangin kan kût huaihawtte a huhova min rawn chhimsak vak loh laiin, keini chuan a huhovin hornbill festival (Nagaland) te, cherryblossom festival (Meghalaya) te, Ziro festival (Arunachal Pradesh) te kan chhim thin a nih hi. Ziro festival phei hi chu 2012 atanga neih tan chauh kha a ni a, anthurium festival (2006) aiin ram mipui hriat a hlawh tawh zawk niin a lang.
Tourism potential tha tak nei anga kan insawina a rei tawh ngaihtuahin kan bawhzui dan hi a la nep hle mai a. Tourism industry bak hi chu state source of income tha tur hi kan nei vak bik lo; chuvangin, tourism lamah hian Beihpui thlak mai hi kan tihtur niin a lang.