Traffic signal light

Aizawl Smart City Ltd-in traffic enkawlna felfai leh tha zawk a awm theih nana a ruahman – Adaptive Traffic Control System (ATCS), traffic signal light hmanga lirthei tlan dan enkawlna tura Aizawl khawpui chhung hmun hrang hranga an lo din tawh zinga hmun hnih, Bazar Bungkawn leh Bawngkawn, Sairang penga a dahte chu karleh Thawhtanni atangin inzirtirna leh enchhinna hun hman tur a ni a. Lirthei khalhtute chu traffic signal light awmzia zir chianga hre thar tur leh Traffic Police duty-te thu ngaichang turin hriattir an ni a, enchhin laia signal light zawm lote chu MV Act hnuaiah hrem theih an ni dawn a ni.
Nimina Sr. SP Traffic, Aizawl District-in thuchhuah a siamah chuan, traffic signal light awmzia, ‘a sen a nih chuan din tur, a eng a nih chuan tlan tura inrin tur, a hring a nih chuan tlan tur’ tih chu mipui hriat turin tarlan a ni a. Traffic signal te, traffic sign hrang hrangte hi chu lirthei khalh thei tura driving license nei thei tawh phawt chuan an hriatchian a, an zawm tur a ni sa hrim hrim a. Hetianga traffic lamin enchhinna an kalpui tur hi a pawimawh hle mai a, lirthei khalhtute tan a hlawkthlak dawn hle niin a lang a, mipui lam tan pawh, him zawk leh muanawm zawka kawngpui kan (crossing) theihna tur a nih pawh a rinawm a, changkanna leh hmasawnna pawchhuaktu ni mawlh teh se.
Aizawla traffic signal light hman theihna (pelican crossing) hi cheng nuai 61 chuang senga kum 2020-a pehfel tawh kha a ni a, tuna enchhinna neihna tur bakah hian hmun dang pariat- Chanmari, Millennium Centre, Civil Hospital ul, AR Ground Gate, Israel Point, Police Station babutlang, Treasury Square-ah pahnih te dah a ni bawk a. Hripui len lai kha a nih avangin Traffic Police kuta a han awm hnu pawh khan hun rei tak chu hman tangkai lohvin a awm a, tunah hian enchhinna neih a ni dawn ta chauh a ni.
Hmun danga traffic signal light an hman thinna kawngpui zau leh ngil tha ang hi Aizawl khawpuiah hi chuan a awm ve lo a, ralkhat atanga control rem ve lo, a hmuna mihringin manual taka a control ngai tur a nih hmel a, mihring tha hi a heh viau a nih chuan, eng tiang chiaha traffic tawt chinfelna atana tangkai tur nge tih chu a taka han kalpui rawih loh chuan hriatthiam a har rih hle.
Eng pawh ni se, planned city-a an hman thin ang chu rem leh rem lovin, keini planned city pawh ni lovah hman ve phet kan tum chu a ni a, traffic tawt sutkianna atan hmanraw tangkai tak ni thei hlauh se a duhawm e.