Traffic signal light

November 13 khan traffic signal light hmanga lirthei chet vel dan thununna chu hman chhin a ni ve ta a. Kan hmunhma ten a zir lo bawk nen, vawilehkhata awmze neia han kalpui nghal mai theih tur chi niin a lang rih lo.
Hun rei tak chhung chu Mizorama lirthei khalhtute khan signal pek dan dik lo an hmang thin a, Mizoram chhungah na na na chuan an inhrethiam tlang a, harsatna em em an nei hran lo. Mahse, mahni chauha awm reng thei kan ni lova, min pawlhsawptu an hnih thum ta a, keini lam pawh state pawn lamah pawihai thilah kan inkhalh chhuak ve ta fo a, kan ram chhunga signal dik lo kan hman ang kha hmun dangah chuan a dik tak an lo hman tawh avangin kan buai phah a, chetsualna hial thlen theihna a ni. Chutih rual chiah chuan, ram dang atanga Mizorama rawn inkhalh lutte pawhin an buai phah ve bawk.
Kha kha kan traffic police chhuanawm takte hian a dik lo tiin mipui zirtirna an kalpui ta a. A tirah chuan kan bah nak nak hlawm hle a, mahse hun a han kal deuh a, kal duhna lam hawia ban vai kual vak vak chunga kutphah bawr hman rim a ngai ta lo. Lirthei siamtu company ten lirthei sira signal light hman tura an dah chu a nihna tur ang takin kan hmang thiam ve ta a, a hahdamthlak ta hle.
Kan kawngpui chep zetah lirthei tlan hmasak inchuh avanga traffic jam fo pawh, kawnghmang neia kal dan traffic police ten mipui min han zirtir a, a tir lamah chuan kan nawi nak nak thin hle. Tunah chuan Aizawl khawpui rawn tlawhtu tourist tam takin social media-ah Aizawl traffic discipline thatzia hahipin an sawi chhuak a, video leh interview pawh social media lamah hmuh tur a tam ta hle a nih hi.
Tunah pawh hian kan han ti leh mah ang a, siam rem ngai lai a lo lang zel ang a, vawilehkhata a fihlim nghal duak loh avanga hmui suihzum mai lovin, dawhtheihna nen mipui lam pawhin dawngsawng thiam ila. Ram changkang zawkten khawl changkang tak tak lei hnuaia an phum thin (inductive coil) tel lo pawhin kawnghmang nei takin kan la chhawr tangkai thei ngeiin a rinawm. Zir tirh bu keu mek kan ni tih i hre phawt teh ang u.