Transport deptt-in editorial ngaipawimawh

Inland Water Transport chungchanga Khawthlangtuipui – Tuichawng-a hmalakna hriatfiah tawk lohte mipui hrilhfiah tura The Aizawl Post editorial (13.1.2025)-in a ngenna chu Mizoram Transport Department chuan ngai pawimawhin hemi chungchang sawifiahna chu tunhnai khan The Aizawl Post a rawn thawn a, chu chu vawiin The Aizawl Post issue-ah hian tarlan a ni.
Democracy sawrkar inrelbawlna do kangtu ban (Pillar) pathum – Legislature, Executive leh Judiciary baka ban pawimawh tak pakhat chu news media (Press) te hi an ni a, a ban palina ‘The Fourth Pillar’ tia koh thin a ni a; mipui leh sawrkar inkara thawk palai an ni ber awm e.
Transport department hian The Fourth Estate nihna leh pawimawhna a hrechiang a, a ngaipawimawh a, a chhan pawh mipui an ni. Hei hi a demcoracy lai tak pawh a ni awm e. Transport deptt-in mipui an ngaipawimawh hi a lawmawm hle a ni.
Tuna Mizorama Inland Waterway kalpui tur pawh hi kum sarih vel kalta atanga bultan kha a ni a, Mizoramah khawmuala inkalpawhna tha kan neih loh avangin lui tui hmanga inkalpawhna mumal zawk siam a ni ve tur hi a phurawm hle a, Mizoram tan hmasawnna mellung thar pawimawh tak a nih ngei a rinawm a. A kaihhnawih department lam pawhin a hlawhtlin ngei theihna tura an bawhzui a pawimawh a, department tan pawh chona lian tak a tling awm e.
Mizoram hian hmasawnna hna thawhna tur sum han thehchhuah tur hi a nei chau thin hle a, annual budget han en pawh hian, thawhktute hlawh bakah, loh theih loha hmanna tur awmsa hi kan sum neihte chu a ni mai; major work thawhna tur sum kan la thawkchhuak ve thei lo. Thawhchhuah mila sum insem (tax devolution) kan chang tam ve pha lo. Chutih rual chuan, central scheme chhawr tangkai tur tam tak a awm ve thung a, hengte hi a nihna tur angin hmang ila, keini ang state zim te, mihring tlemte awmna tan hi chuan ‘developed state’ nih theihna chance a sang hle.
Tuna Inland Waterway buaipui mek hi, Mizoram tana ro tling (asset) ni thei turin a buaipuitu department hian tan han la sauh sauh teh se.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More