Treadmill a kal chunga ball sep-in record siam

Treadmill a kal chunga ball sep-in record siam
Iran rawlthar Meraj Zamaniyan chuan treadmill a kal chungin minute khat chhungin ball vawi 181 a sep hman a, second 0.33 chhungin ball vawi khat sep hman zel ang a ni a, treadmill-a kal chunga minute khat chhunga ball sep hnem ber record a siam. Hmeichhe lama hetiang record siamtu pawh Iranian tho niin, Mohadeseh Goudasiaei chuan March 2024 khan treadmill a kal chungin minute khatah ball vawi 178 a sep hman ve thung.
Meraj hian naupan lai atangin football sep a tuipui tawh a, kum 7 a tlin chuan ball sep a hnehsawh tawh viau. Treadmill a kal chunga ball sep hi chu kum nga kalta atanga a tuipui tan niin, “A tirah chuan speed hniam tein bul ka tan a, 2.5 kmph vel chauhin ka ti thin. A speed ka tisang telh telh a, mahse, 6.5kmph thlen chu a har khawp mai,” a ti.
Miraj chuan football sep chu nitin a zir thin niin a sawi a, “Record siam tumna rilru ka neih atangin thla ruk chhung ngawrh takin ka inzir a, nitin darkar 2 vel ka tiziah a, treadmill a kal chunga ball sep bakah strength training leh aerobic exercise thlengin ka ti thin,” a ti bawk.
Miraj hian footballer zingah Cristiano Ronaldo a ngaisang hle a, professional footballer nih a chak thu a sawi bawk.