Treasury khar a ni lo Bill tang pechhuak zel

Aizawl North leh South Treasury-a thawktuten treasury khar anga thuthang awm chu thu belhchian dawl lo a ni tih an sawi a. Hun rei tak chhunga bill tangte an pe chhuak mek zel zawk tih an sawi.The Aizawl Post zawhna chhangin Aizawl North Treasury hotute chuan, hun rei tak chhunga bill tangte a theih ang angin an pe mek tih an sawi a. Mizoram sum dinhmun a tha thut thei rih lo tih sawiin, sum hlawm liantham chhuak tur chu Finance principal secretary hriatpuina chauhin an pe chhuak a. Cheng nuai 10 hnuailam chin chu nitin a tam thei ang ber an pechhuak thin tih an sawi.
Aizawl South Treasury hotute pawhin, Reserve Bank of India-in state finance khar tura hriattirna a pek chauhin treasury chu khar a ni thin tih an sawi a. Tun dinhmunah treasury officer-ten an daily ceiling an la hmang thei reng a, bill tang hrang hrang an pechhuak reng tih an sawi a ni.
Hetihlai hian Congress Thalai Hqrs. thuchhuak chuan enchhin tura inzuar, mipuia financial management thiam leh tha zawk entir tumtu ZPM sawrkar chuan thla thum pawh an la sawrkar hma in treasury khar (stop payment) a ngai tih a sawi ve thung.
‘Ni 50 chauh an kal chhungin OMB (Open Market Borrowing) hmangin cheng vaibelchhe 80 puk an tum leh der tawh a. Mizoram sum harsat zia leh inrenchem ngaih zia hrereng chunga duhsak zawngte vulh nan leh lungawilo thlem nan chief minister adviser hautak lutuk ruat teuh teuhte hian inrenchemna kalpui an tum loh zia a tichiang a, an sum renchem loh phuhruknan mipui harsatna chhawk zangkhai aia phur tirit tura tui bill tih san tuma hma an la zui hi mipui an zah loh leh pawisak loh zia a chiang a ni,’ a ti. Mizoram sum dinhmun hre chunga ruahmanna siama hma la turin sawrkar a ngen tih a sawi.