Treasury Square bazar a kang

Treasury Square bazar a kang
March 17 zing khawvar hma khan Aizawl Treasury Square bazar a kang a, mihring thi leh hliam an awm lo. Thil zuarte thutna leh bungraw thenkhat bakah thingpui dawr leh PAMRA office a kangral a, a bulhnai dawr leh office thenkhat tihchhiat a nei nual bawk.
Thudawn danin, Thawhtanni zing dar 3.00 vel khan Assembly House leh Directorate of Information & Public Relations inkara bazar-ah kangmei a chhuak a. Fire & Emergency Services leh khawtlangin thehtawp an chhuah hnu zing dar 7.30 velah thelh mih a ni.
Helai bazar-ah hian chawhmeh zuar, thawmhnaw leh thildang zuar thutna bakah thingpui dawr a awm a, thingpui dawr awmna building hi Thanzami Tochhawng, Venghlui ta niin, thingpui dawr hi a hnuai berah a awm a, a chungah hian chhang dawr leh ZoRO office awmin, a chung berah PAMRA office a awm. PAMRA office hi thinga rel a ni a, a kangral vek a, a hnuai pahnih hi concrete a nih avangin kangmei hi an tuar na lo deuh a ni. Dawrte hi 63 vel a kangral vek nia hriat a ni.
Assembly House secretariat leh I&PR directorate building hian kangmei hi an tuar nual bawk a, office bungrua leh tukverh darthlalang engemawzat a chhia a ni.
Kangmei chhuahna hmun hi minister thenkhat bakah Aizawl mayor, deputy mayor leh corporator thenkhatin an tlawh nghal a ni