Tribal mite tana hamthatna tur scheme centre-in kalpui tan mek

Sawrkar laipui Ministry of Tribal Affairs chuan a bulthuma sawrkar tih chakna turin ‘Aadi Karmoyogi Abhiyaan’ hnuaiah hma a la mek a. He Abhiyaan-in a tum ber chu, tribal chenna huamchhung bikah chak taka sawrkar inrelbawlna kalpui a nih theihnan sawrkar mi leh sa nuai 20 chuang hruaitu tha ni thei tura chherchhuah a ni.
Kumin Independence Day lawmnaa Saituala hmanpuitu minister Dr Vanlalthlana chuan, India ram hmun hrang hranga tribal-te dinhmun chawikang turin Ministry of Tribal Affairs-in Aadi Karmayogi Abhiyaan a kalpui chungchang hi a sawi a. Tribal area-ah hian hriselna kaihhnawih (healthcare), zirna (education), hmasawnna ruhrel (infrastructure) leh sector dang hrang hrang hrang tih hmasawnna tur sawrkar scheme tha tak tak hnuaia hamthatna awm angte a tam thei ang berin an dawn theihnan uluk lehzuala hma lak chu a tum pawimawh ber a ni tih a sawi.
Hei bakah hian chak taka sawrkar inrelbawlna kalpui a nih theihnan sawrkar mi leh sa leh a thawhpuite training hmanga infuihthar pui a, mipui tana chhenfakawm ni tura inchherchhuah, tribal-te harsatna leh mamawh hmuh chhuaha siamthat leh line department hrang hrang thawhhona tha zawk neih chu he Abhiyaan hian a tum tih a sawi a ni.
Hemi atan hian Mizoramah pawh district hrang hrangah hma lak tan a ni a. District nodal officer ruat, district level master trainer, Block nodal officer leh district chhunga thawhpui tur civil society organization /NGO ruat tawh pawh an awm a ni.
An ni hian state process lab-ah training paltlangin, training paltlang tawhte hian district process lab leh block level process lab-ah field level staff thlenga training pek beihpui thlak tum a ni. Heng bakah hian District Responsive Governance Group leh War Room siam tawh pawh awmin, chak lehzuala mipui lungawi lohna chinfel (grievance redressal mechanism) kawngah district level, block level leh village level thlenga chak taka chinfelna tur hmun Seva Centre din leh, department tin thawhhona (convergence) hmang tangkaia khua hmasawnna tura village action plan siamte a huam tel a ni.
He ‘ Abhiyaan’ beihpuiah hian line department hrang hrang tanhona mamawh a ni dawn a. Line department hrang hrangin Aadi Karmayogi Abhiyan SOP/guidline-a tarlan, mahni chanvo theuh tlin taka hlen tura ngen an ni. Village /local council zawng zawng pawh he Abhiyaan hnuaiah hian Special Gram Sabha nei tur leh, Gram Sabha remchang apiangah he Abhiyaan tana hun remchang siama mipui hriattirna leh thawhhona tha neih theihna atan hma la tura ngen an ni.