Tripura-ah tang dun BJP leh Tipra Motha mite intibuai

Tripura-ah tang dun BJP leh Tipra Motha mite intibuai
Tripura-a politics boruak inlumlet mekah BJP leh sorkara an thawhpui, Tipra Motha mite chu Pathianni tlai khan BJP thlawptuten Prime Minister Narendra Modi-a’n thla tin radio-a thu a sawi thin, Mann Ki Baat an ngaihthlak laia tibuaiin tharum thawhna a thleng.
Police chuan Khowai district-a buaina a chhuah hnuah hian thubuai an ziak lut tih an sawi.
Politics-a mi thiamte chuan tun tuma thil thleng hian Tripura-a tangho party pahnih inkarah khi chiang takin a awm a, a zau telh telh zel tih a tilang niin an ngai hlawm.
“Kei chuan ngaihdan ka nei lo va; mahse, tu zawk nge beitu chu tual chhung miten an hria. A titute pawh an hria a, police hnenah thubuai an ziak lut a. Police hian a titute lakah na taka hma lain an man ngei ang,” tiin Tripura Chief Minister Manik Saha chuan thuthar lakhawmtute hnenah a sawi.
Police chuan BJP hruaitu leh thlawptute mi 30 bawr velin Asharambari assembly biala in pakhatah Mann Ki Baat hi an ngaithla tih an sawi.
Tipra Motha worker leh thlawptu thahnem takin an awm khawmna hi thlengin an intibuai zui ta a, a chhan tak hi hriat theih a la ni rih lo niin an sawi bawk.
Tipra Motha dintu, Pradyot Manikya Debburman-a chuan social media-ah video dah chhuakin intihbuaina hi a thleng ngei tih a sawi a. “Tripura-ah hian politics thila tharum thawhna hi kan duh lo va. Tiprasa hian politics hmangin kan bei zel dawn a, engtik niah emaw chuan ram engmah nei lovin kan la awm mai dawn a. BJP pawh lo fimkhur sela, CPI(M) thlawptu thenkhat chu BJP emaw, Motha emaw anga awmin hetiang hi an ti,” a ti.
Buaina chhuakah hian motorcycle pariat leh car pahnih a chhia a, a hmunah hian police thahnem tak dah nghal a ni a. Boruak pawh a la tang zui hle niin an sawi.