Trophy hawn thei manager kan mamawh – Shearer

Trophy hawn thei manager kan mamawh – Shearer
England national team head coach thar ni tura Thomas Tuchel nemngheh a nih hnuah sawiseltu lam an rawn lang tuam tuam a, Three Lions tana goal khung hnem ber lo ni tawh Wayne Rooney pawhin English coach an ruai lo mak a tih thu a lo sawichhuak tawh a, tunah England captain hlui Alan Shearer a rawn tawngchhuak ve leh a, German coach chu tournament liana an ram champion-pui thei tur hmuhin a hmu lo deuh nge an ramin amamawh chu trophy hawnpui thei tur manager a nih thu a sawichhuak ve leh!
Three Lions hian tunhma atangin ramdang coach hi an ruai zen zen lo a, kum thar January thla atanga an chhawr tan tur kum 51 mi Tuchel hi England men’s team enkawl tura rawih non-British permanent head coach pathumna chiah niin, Sven-Goran Eriksson leh Fabio Capello-te hnung a zui dawn a ni.
Tuchel hian England-ah hnuhma hraw a lo hnutchhiah tawh a, kum 2021 khan Chelsea boss a nih laiin London club chu Champions League trophy a lakpui a; tunah kum 60 zet an nghah hnu pawha an hlawhtlin theih lohna major trophy lakpui theitu a nih beiseiin an senglut a, contract zawh hmaa an inban lo a nih chuan 2026 World Cup-ah England a hruai ang.
Head coach thar chungchang sawiin Newcastle United striker hlui chuan, “A mawlmang thei ang berin sawi ila – trophy kan mamawh a ni. Chu kan mamawh min lakpui theitu tur manager kan mamawh.
“Tuchel hi coach tha a ni tih chu rinhlelh rual a lo a, mahse, a kawng zawh ber kher hi chu enchhinna dang daih a ni a, FA-in ani an han thurchhuak hi chu a huaisenthlak khawp dawnin ka hria a, chu mi chungchang chu rinhlelh tur a awm lo.
“Tournament hnehtu nih kan mamawh a, chu chu German coach kan rawih chhan pawh a ni,” tiin Tuchel rin ngam lohna lam hawi thu a phuhchhuak.
Euro 2024 final-a Spain an hneh loh hnu lawk khan Gareth Southgate chuan a nihna a bansan a, England chuan permanent manager a neih hma atan Lee Carsley chu manager lailawk atan a ruai a, tunah, kum thar herchhuah ruala head coach hna chelh zui nghal turin Tuchel an lalut ta a ni.
Southgate hi 1966 World Cup winner Sir Alf Ramsey tih loha major tournament final khel tura England men’s team hruai thleng thei coach awmchhun niin, Euro 2020 leh Euro 2024-ah final a khelhpui.
Amah sawiselna thawm a rikchhuak mek laiin ngland boss Thomas Tuchel pawh a ngawi mai mai bik lo a, tunhnaia BBC mi rawih Dan Roan nen an inkawm tumin German passport neitu a lo ni palh hlauh pawi a tih thu sawichhuak el pah chungin, sport-ah chuan theih loh tak tak a awm loh thuin sawiseltute a chhanglet.
Blues boss hlui Tuchel chuan history atanga zalenna dar an khawnrik theih thu sawiin, world champion vawikhat an nih chhun sawichhuah leh fo ngai tawh lo turin 2026 World Cup-ah hian a team thar chu hlawhtlinna chanpui ngei a tum thu a sawi.
January ni 1 atanga Three Lions boss nihna official-a chelh chho tan tur Tuchel hi thla 18 daih contract an ziahpui phawt a, a contract hi a hmang tluan zo lo ang nge inremna an ziahbelhpui ang tih chu a chetthat leh that lohin a la hril dawn a ni.