Truck neituten an harsatna thlen

Mizoram Truck Owners’ Association (MTOA) hruaitute chuan Zirtawpni khan larsap Dr Hari Babu Kambhampati chu Raj Bhavan-ah an hmu a, an harsatna an thlen.
MTOA hruaitute hian Bairabi rel station-a rel lut leh chhuak mumal lo tak avanga harsatna an tawh thu an thlen a. Bairabi railhead atanga Mizoram hmun hrang hranga buhfai dahkhawlna hmunah buhfai phurh sak turin FCI contractor-te hnuaiah an inhlawh a. Tun dinhmunah rel luh leh chhuah dan a mumal loh avangin truck neituten harsatna nasa tak an tawk mek tih an hrilh.
Bairabi station chuan hmunhma, hmanrua leh thawktu a neih that tawk loh avangin hmun chep takah truck tam tak inhnawhkhawm a ngai tih an sawi a. Hei vang hian a hun takah bungrua an hlanthlak theih loh phah thin a. He harsatna hi sutkian a nih theih nan larsap chu Railways hotute leh FCI hotute biaksak turin an ngen tih an sawi a ni.
Larsap chuan MTOA thu thlen leh an harsatna tawh chu a tul anga hma lakpui a tum tih a sawi a. MTOA pawh North-East Frontier Agency (NEFA) Guwahati general manager hmu turin thurawn a pe a, recommendation letter a ziahsak nghal a ni.