Trump-a dap chhuah beihpui thlak duh lotu thahnem tak man

Trump-a dap chhuah beihpui thlak duh lotu thahnem tak man
Los Angeles police chuan US President Donald Trump-a’n an rama dan lova awm dap chhuah beihpui a thlak duh loh lantir ni ngana a thlen hnuah ‘mi tam tak’ an man tih an sawi.
Mayor Karen Bass-i chuan khawpui chuan hnuai lam district hmun zim tê-ah zanah curfew a puang a, sumdawnna hmunte suasam leh rawk a ni tih a sawi.
Zirtawpni atanga pem lutte dap duh lohna hi chhuak tanin National Guard sipai tirh luh an ni a, border control agent-ten dap beihpui an thlak chu an veng.
Trump-a chu LA-a sipai a tirh luh chungchangah state thuneitute nen an inbei mek zel a. President hian khawpui chu ‘thlah zalenah’ a vau a, California Governor Gavin Newsom-a chuan mipui rorelna ‘palzutah’ a puh ve thung.
Trump-a chuan khawpuia National Guard sipai 4,000 leh Marines 700 a tirh luh chu ‘ram dang mi hmelmaten khawpui an hneh tur’ venna a nih thu a sawi.
Sipaite hian mi man theihna an nei lo va, sorkar laipui hmunhma leh mihring vengtu tur chauh an ni.
Newsom-a chuan president chu ‘buaina a thlang leh a, tharum bawk a hmang leh’ tiin a sawi a. Democratic Party atanga president thlan chuh tura rinkai zinga mi, California governor hian ‘a dawtah state dang’ tiin a sawi lawk bawk.
LA chuan hnuaia Thawhlehni zan dar 08:00 (India-a Nilaini zing dar 08:30)-a curfew tan atangin police chuan hmun hrang hrang fangin thelret silaimu hmangin pungkhawmte an hnawt darh.
Curfew a puan chhan sawiin Bass-i chuan ‘thil suasak leh inrawkna’ tihtawp a duh tih a sawi.
Los Angeles Police Department (LAPD) chuan a hnuah district chhungah mi eng emaw zat pungkhawm an la awm tih a sawi a. Curfew puan hma lawkin LA police chief Jim McDonnell chuan Thawhlehni khan mi 197 an man tih a sawi a. An mi man tam ber hi duh lohna lantir atanga an hnawh darh theih lohte an ni hlawm.
Curfew hi US-a khawpui lian ber pahnihnaa mel khat bial chuang awrhah chauh kalpui a ni a. McDonnell-a chuan khawpui hmun dangah kalpui a ni lo tih a sawi.
LA mayor chuan Thawhtanni zan khan sumdawnna hmun 23 rawk a nih thu leh tharum thawh zawnga chetna avanga an khawpui sum hloh zat erawh a sawi lo.
Thawhlehniah chhunah boruak a dai viau a, zirlaiten sikul an kai a, kawtthlerah vaivak an tamin Hollywood Boulevard-ah pawh khualzin an tam leh tawh.
Hetih lai hian Thawhlehni atang hian US khawpui lian dangte pawh a kang kai tan a. Atlanta, Georgia-ah chuan mi 100 chuang pungkhawmin officer-te halpuah hmanga an vawm avangin a hnawh darh nan riot police-ten tear gas-in an phuh.
New York-ah chuan Manhattan chuan hnuai lama mi sang chuang kawng zawhin lirthei kalna an dan avangin thahnem tak police-in an man.
Texas Governor Greg Abbott-a pawhin kawng zawh tumna a awm avangin San Antonio-ah National Guard sipai a dah lut.