Indian External Affairs Minister S Jaishankar-a chu January 20-a Washington DC-a United States president atana Donald Trump -a lak luh inkhawmah a tel dawn tih sorkarin a puang.
“Trump-Vance Inaugural Committee-in min sawm angin External Affairs Minister (EAM) Dr S. Jaishankar chu United States president 47-na atana Donald J Trump-a lak luh inkhawmah India sorkar aiawhin a tel ang,” tiin thuchhuahah hian tar lan a ni.
US a tlawh chhung hian Jaishankar-a hian Trump-a sorkar thara mi pawimawhte leh mi dang dang a kawm nghal ang.
Trump-a hi US Supreme Court Chief Justice-in Capitol Building kawtah a la lut dawn a. Rinawmna thu a tiam zawhah thu a sawi nghal ang a, he inkhawmah hian president kal chhuak tur, Joe Biden-a pawh a tel dawn a. Kum 2020 inthlana a chak lo tum erawh kha chuan Trump-a hi Biden-a lak luhnaah a tel lo thung.
Trump-a hian a sorkar thar lak luhnaa tel tur hian khawvel ram hruaitu eng emaw zat a sawm nia hriat a ni a. Argentina President Javier Milei leh Israeli Prime Minister Benjamin Netanyahu te chuan an tel tur thu an tichiang tawh a. Hungary atangin Viktor Orban pawhin tel a tum tih a sawi tawh.
Kum 78 mi, Trump-a hi US president 45-na tur niin January, 2017 atanga January, 2021 thleng White House luah tur a ni.
Trump-a lak luhnaah India aiawhin Jaishankar
Get real time updates directly on you device, subscribe now.