Trump-an amah heknate behchhan awm lo ti

US President hlui Donald Trump chuan federal hekna siamsak chu ‘awm ang lo leh behchhan awm lo’ tiin thubuai siamsak a nih hnua mipui hriata thusawi a neih hmasak berah a sawi.
Trump lakah hian thil 37-ah hekna siam a ni a, a chenna Florida-a Mar-a-Lagoah document pawimawh te lo chheprelh anga puh a ni.
A campaign a thusawina a neihah Trump chuan amah heknate chu ‘corrupt’FBI leh justice department tena ‘inthlanna tihbuai an tumna’ tiin a sawi bawk a. Engmah tihsual a neih loh thu a sawi bawk.
Trump hi classified documents pawimawh em em te za tel khawih buaia puh niin chung zingah chuan US nuclear secret leh military plans te pawh a tel a.
Amah heknaah chuan heng file pawimawhte hi Florida-a a chenna Mar-a-Lago ah ballroom leh shower ah te thukruah an puh a.
Puhnaah chuan investigator te hnenah dawt sawiin amah chhuichianna tihbuai a nih theih nan hma a la an ti bawk a. Tun hi US president ni tawh laka criminal prosecution kalpui hmasak ber a ni bawk.
Georgia-a Republican party convention neihnaah Trump thung chuan, “An ti ru a, misual an ni a, an corrupt a, heng criminal te hi lawmman pek chi an ni lo va, hneh an ngai a ni,” tiin a sawi a.
Fiamthu chungin ‘blue state’ (Democrats te chakna) lama a kal apiangin court thubuai a neih bel zel mai a ti bawk.
Trump hian kum 2024 White House luah tur thlannaah chuh a tum thu a sawi chiang tawk a, amah hekna te chu ‘hoax’ tia sawiin corrupt political establishment tena an beihna tia sawiin amah tihchhiat tuma beihna chu nuihzatthlak tiin a sawi bawk a.
A rally neihnaa pungkhawm mipuite chu ‘ram leh hnam hmangaihtu’ tia sawiin misualte an ram enkawl mekte tia a sawite chu a sawisel bawk a.
“Political establishment awm mek te hi kan cho dawn a, kan hna bul tan kan tihlawhtling ang a, president hlawhtling ber kan ni ang,” tiin a sawi bawk a.
Amah beitu nia a sawi te chu Marxists te, communists te, environmental extremists te, Rinos-Republicans an hming chauha awm te bakah open border fanatics leh radical left democrats te tiin a sawi bawk.
Amah hekna chungchangah highly-sensitive documents te chu Espionage Act ni lovin Presidential Records Act hnuaia awm zawk tur a ni, a ti a.
Presiential Records Act hnuaiah chuan White House records te chu National Archives-ah administration tawp ruala lut tur a ni a, chung files te him tak dah tur chuan regulation siam ngai a ni.
Special counsel Jack Smtih, Trump chhuichianna kalpuitu chuan an chetlak dan chu politics thil engmah a awm lo a ti a, “He ramah hian dan kan nei a, chu chuan mi tin a huap,” tiin a sawi a. National defence information te chu danin a humhim a ni a, a pawimawh em a, kenkawh ngai a ni, tiin a sawi bawk.