Trump-a’n Greenland chung-chang inrem tur a awm ti

Trump-a’n Greenland chung-chang inrem tur a awm ti
US President Donald Trump-a chuan ‘Greenland zah tak chungin nakin zel atana inremna tur kalhmang’ a awm tih a puang a, he kalhmang (framework) a sawi hi eng ang chiah nge tih erawh hriat a la ni lo.
Trump-a’n hian tun hnaia Denmark thuneihna hnuaia inawpna hran nei thliarkar neih a duhna pawmpui lotu a thawhpui ram pariatte lakah chhiah lak a tum avanga boruak tang angreng tak a awm laiin hetiang thu hi a sawi a ni.
Ruahmanna a neih hi Denmark leh Greenland ten an pawmpui danw em tih hriat a ni lo va, Arctic-a khawvel thliarkar lian berin inrelbawlna hran a neih chu a khawih buai dawn em hriat a la ni lo.
President Trump-a hian a duh dan hi a Truth Social media platform-ah Nilaini (India-a Ningani tlai) khan a tar lang a, Davos, Switzerland-a World Economic Forum-a thu a sawi zawh hnuah a ni.
“NATO Secretary General Mark Rutte-a nen inkawmna hlawh tak kan neih kal zelah Greenland hi zah tak chungin hma lam huna inremna tur kalhmang siam a ni,” a ti.
A bak engmah a sawi lo va; mahse, inremna tak tak awm tur chuan la indawr zui a la ngai tih erawh a tar lang.
Rutte-a thung chuan an inkawmnaah hian Danish-in Greenland-a thu a neihna chungchang engmah sawi an nei lo tih a sawi ve thung.
Denmark chuan ngaihdan hrang a nei a, eng inremna pawh awm dawn se mi dang tel lovin, Greenland, Denmark leh US ten a huhova an siam ngei a duh.
Danish Prime Minister Mette Frederiksen-i chuan Dane-te chu ‘politic, venhimna, investment leh eibarah rawn zel an ni’ tih a sawi a; “Mahse, kan inrelbawlna hran neihah erawh insiam rem theih a ni lo va. Hemi chungchang hi chu thil dang nena khaikhin chi a ni lo,” tiin Ningani khan a sawi.
Danish parliament-a Greenlandic lawmaker pahnih zinga pakhat, Aaja Chenmitz chuan, “Nato hian keini, Greenland chungchangah hian mi dang nena inrem siamna lo siam ngawt theihna a nei lo va. Keini tel lohna chu engmah a ni lo,” a ti ve bawk.
The New York Times chanchinbu chuan thuneitute hnen atanga an hriatah Denmark hian Greenland-ah hian US-in sipai hmun a dinna tur hmun rem tereuh tê sahthlak rawtna a awm niin an tar lang.
Hetiang inremna hi ram dang pawhin neiin Cyprus-ah pawh hman a ni a, UK-in sipai hmun hnihah sipai dahin thuneihna a nei mek.
Hetih lai hian Denmark leh Greenland chuan hetianga an ram bung thenkhata thuneihna neih loh hi an duh lo va. Greenland neih a duh chhana Trump-a’n a sawi, Chinese leh Russian lawng liante thliarkar velah an che vel tih chu Denmark chuan tun thlengin ‘hlauhawm a awm lo’ niin a sawi bawk.
US hian Indopui II-na atang khan Greenland-ah sipai a dah sa reng tawh a. Kum 1951-a Denmark nen an inrem angin US hian sipai tam zawk pawh a dah thei reng a. Tunah 100 chuang chu hmarthlang tawp, Pituffik base-ah an awm mek a ni.
Trump-a hian Greenland hi president a nih hmasak atang tawh khan neih a lo duh tawh a. US-in Russia leh China atanga beihna a tawh palh atan a mamawh niin a sawi thin.
Greenland hi Golden Dome defence system bunna atan a duh a, he ralthuam hi missile hmanga beihna laka an invenna tur a ni.
Himna chungchang bakah ram zau leh luahtu tlem tak thliarkar hi leilung hausakna vang chi tamna a nei a, hemi hai chhuah hi a duh bawk nia hriat a ni.