Trump-a’n indona tichhuaktuah Zelensky puh leh

Trump-a’n indona tichhuaktuah Zelensky puh leh
Russian-ten Ukrainian khawpui, Sumy beia mi 35 thihna leh hliam tuar mi 117 an awm hnuah Donald Trump-a chuan Volodymyr Zelensky-a chu Russia nena indona tichhuaktu-ah a puh nawn leh.
US president hian Ukraine hruaituin an buainaa ‘mi maktaduai tel’ an thihnaa Russian President Vladimir Putin-a a mawhpuhna chungchang a sawi a. “Nang aia a let 20 vela ram lian nena indona i chawk chhuak tur a ni lo va, mipui hnen atangin missile pek i beisei leh bawk si,” tiin Thawhtanni khan White House-ah a sawi.
Pathianni khan Russia chuan Sumy beiin indona kal meka kumina civil mi an thih tam ber tum a ni a. Thawhtanni zan khan khawpui dai a kap leh bawk.
Trump-a chuan Thawhtanni khan a vawi khat nan Sumy beihna hi sawi chhuakin ‘rawng’ a nih thu a sawi a; mahse, Russia chuan ‘a tisual palh’ niin a sawi tel thung.
Moscow chuan Ukrainian sipaite thukhawm beiin 60 an thi niin a sawi a, finfiahna erawh a sawi tel lo.
Ukrainian chanchinbute erawh chuan sipai bângte medal hlanna hun hman a ni zawk niin an tar lang ve thung a. Zelensky-a chuan Sumy-a regional chief chu Thawhlehni khan hetiang a huaihawt avang hian a bân nghal bawk niin chanchinbute chuan an tar lang.
Trump-a hian Thawhtanni khan a thlak tak, Joe Biden-a chu indonaa thi an tam chhanah a puh a. “Mi pathum vangin mi maktaduai tel an thi a ni,” a ti.
“A hmasa berah chuan Putin-a a ni a, eng nge tih dan tur hre lo Biden-a a ni leh a, Zelensky-a a ni bawk,” a ti.
Zelensky-a bik chungchang an zawhna chu Ukrainian hruaitu hian ‘missile lei tur a zawng reng’ niin a sawi a. “Indona i tan a nih chuan hnehna i chan dan tur pawh i hre tur a ni,” a ti.
Zelensky-a president a nih hma kum nga, kum 2014-ah Russia-in Ukraine hi bei tan tawh mah se Trump-a hian Zelensky leh Biden hi a lo dem fo tawh.
Trump-a chuan, “Biden-a khan a titawp thei a, Zelensky-a pawhin a thei a. Putin-a pawhin a tan tur a ni lo bawk,” a ti.
Trump-a leh Zelensky-a inkar hi February-a White House-a an inhauh atang khan a tha lo tan a, US hruaitu hian Ukraine president hi Russia nena inremna tura inbiak duh lovah a puh.
Trump-a hian Moscow a kawmngeih zui a. A sorkar chuan Russia leh Ukraine inkahhaina tura inbiakna kalpuiin hetah hian Kyiv an telh ve lo thung.
Thla hmasa pawh khan Trump-a hi Putin-a nen phone-in an inbia a. February khan Washington chuan UN thutkhawma Russia-in Ukraine a bei tih thutlukna a siam turah pawh Moscow tanin a vote bawk.
Indona mual lamah Ukraine-a sipaite chuan Thawhlehni khan Sumu beihtu Russian rocket brigade an kap fuh niin an sawi.