Trump-a’n president chuh tawh hmel loh

Trump-a’n president chuh tawh hmel loh
US President Donald Trump chuan a term thum nana president chuh leh chu a tum lem lo niin a sawi a, hei hi mi thiamte pawhin an ram danpuiin a phal lo niin an lo sawi tawh thin.
“Kum riat president ka ni dawn a, term hnih president a ni a. Chu chu a pawimawh khawpin ka ngai,” tiin Trump-a hian NBC-a Meet the Press with Kristen Welker-in an an kawmna, Pathiannia tihchhuahah a sawi.
Kum 78 mi, Trump-a hian a hmain a vawi thumna, a vawi lina thleng pawhin, US president nih a tum chu ‘a fiamthu lem lo’ tih a lo sawi tawh.
A hnuah erawh he a thu sawi awmzia hi ‘chanchin thar dik lo’ a sawinepna a nih thu a sawi leh.
A company, The Trump Organization chuan ‘Trump 2028’ lukhum erawh an hralh chhuak tan mek a, hei hian January, 2029-a a president term hnihna a tawp hnuah nih leh a tum nia rinna a tilian hle a ni.
Zirtawpnia Florida-a an kawmna tihchhuahah hian Trump-a hian mi tam tak hnen a pisa luah zui tura bei leh tura ‘ngenna’ a dawn thu a sawi.
“Mi tam tak chuan ti leh turin min duh a ni,” tiin ni reilo te liam taa a term hnihnain ni 100 a tlin lawmtu chuan a sawi.
“Ka hriatna atangin tih phal tawh lo niin ka hria a. Danpuiin a phal lo em tih leh thil dang lam chu ka hre thui lem lo,” a ti a. Mi tam takin ‘2028 hat’ erawh an hralh tawh thu a sawi.
“Chutih rual chuan hei hian kan ti leh dawn tihna a lantir chuang lo,” a ti a. President a chuh dawn lo a nih pawhin a thlaktu turin Republican tam tak an la awm a, heng zingah hian Vice-President JD Vance leh Secretary of State Marco Rubio te hming pawh a lam chhuak.
Danpui 22nd Amendment chuan ‘tu mahin president pisa chu vawi hnih aia tam an luah tur a ni lo’ tiin a inziak a ni.
Danpui tidanglam tur hian Senate leh House of Representatives-a thu hmun thuma thena hmun hnihin an duh a ngaih bakah an ram chhung state sorkar hmun lia thena hmun thumin an duh a ngai bawk.
Hetih mek lai hian Trump-a tantute chuan danpuia inziak hi a kimchang tawk lo va, court-a thlen chuan hneh theih niin an ngai.