Trump-a’n Putin-Zelenskyy inbiakna thlentir tum

Trump-a’n Putin-Zelenskyy inbiakna thlentir tum
US President Trump-a chuan Ukrainian President Volodymyr Zelenskyy leh Russian President Vladimir Putin-a te en an pathuma inbiakna thlentir ngei a tum tih a sawi.
Alaska-a Russian president nena an inbiak hma ni hnih, Nilainia European hruaitute leh Zelenskyy-a te nena an inbiaknaah hei hi a sawi a, a thlen thuai a beisei tih a sawi bawk.
Inbiaknaah hian Ukrainian president chuan kum lina atana indo mek, Russia-Ukraine inkara inkahhai a awmna tura indawrnaah an ram tel lovin engmah tih theih a ni lo tih a sawi nawn leh a. Russia-in inkahhai puan tumna a pawm lo a nih chuan hrek ngei a duh thu a sawi bawk.
Trump-a chuan Zirtawpnia Putin-a nena an inkawmnaah ‘thil a that chuan’ Ukraine leh Russia nen an pathuma inbiakna a awm theih tur thu a sawi.
“A thlen thuai ka duh,” a ti a. “A vawi hnih nana President Putin leh President Zelenskyy an inhmuhna a thlen thuai ka beisei a, an inbia a nih chuan kei pawh tel ve ka tum,” a ti.
US president hian Putin-a’n indona tihtawpna tur a pawm lo a nih chuan Moscow chu hrek a nih tur thu a sawi bawk.
Thuchhuah intawm an siamah UK, France leh Germany hruaitute chuan Zirtawpniah inkahhai puan pawm a nih loh chuan Russia hrek ngei tur a nih thu an sawi.
Nilainia ral atanga Zelenskyy leh European hruaituten Trump-a an biaknaah hian France President Emmanuel Macron leh UK Prime Minister Keir Starmer te pawh an tel.
Trump-a an biak hma hian Zelenskyy, European hruaitu leh NATO leh European Union hruaitute an inbe hmasa bawk.
Trump-a leh European hruaitute hian an inbiakna chu a hlawhtling niin an sawi hlawm a, US president hian ‘inbiakna tha tak’ a ti.
Kennedy Center-a thuthar lakhawmtute a kawmnaah Trump-a hian Zirtawpnia Putin-a nena an inbiak zawh veleh Zelenskyy leh European hruaitute hi a be lehnghal dawn tih a sawi bawk.
France President Macron-a chuan Trump-a hova an inbiak zawhah US hruaitu hian Putin-a nena an inbiaknaah hian Ukraine-a inkahhai awmtir ngei a tum tih a sawi.
US president hian Putin leh Zelenskyy te nen an pathuma inbiakna thlentir pawh a tum tih a sawi bawk.
Hetih lai hian Russian foreign ministry chuan tlaikhawhnua Europe ramten Trump-a dawra palai hna an thawk chu ‘awmze awm lo’ a tihsak.
Indona mualah chuan Russia-in hma sawn zelin Donetsk region-ah Suvorovo leh Nikanorovka khua an la leh niin an sawi a, Ukrainian thuneitute chuan mihring chenna hmun eng emaw zatah insaseng tura tihna thupek an chhuah.
Kremlin sipaite hian Thawhlehni khan kum khat chuang hnua ni khata hma an sawn nasat ni an tawng niin US-a Institute for the Study of War chuan a sawi.