Trump-a’n Ukraine ram pe kir turin Putin-a dawr dawn
US President Donald Trump-a chuan Zirtawpnia Russian President Vladimir Putin-a nena an inbiakna turah ram bung thenkhat chu Ukraine hnena pek kir leh turin hma a la dawn tih a sawi.
“Russia hian Ukraine ram zau tak a luah a. Ukraine hnena hlan let turin ka bei dawn a ni,” tiin thuthar lakhawmtute a kawmnaah a sawi.
Trump-a hi Russian president nen hian kartawpah hian Alaska-ah an inbe dawn a. Thil a kaltluan cuan minute hnih lek chhungin thil an ching fel vek thei tih a sawi.
Trump-a hian Russia leh Ukraine inkar ‘thil inthleng leh ram inthlak thleng’ pawh a thleng thei tih a sawi lawk.
‘Ram inthleng’ hi a vawi khat sawina a ni lo va; mahse, khawi lai nge Russia-in Ukraine a pek tur erawh a sawi chiang ngai lo va. Kyiv pawhin khawi lam Russian ram mah a ram angin a la chhal ngai lo.
Trump-a chuan Putin-a’n ‘inremna felfai’ a siam a nih chuan European hruaitute a hrilh dawn tih a sawi a, Ukrainian President Volodymyr Zelensky-a a be hmasa dawn tih a sawi bawk.
“Ka bei hmasa ang… ka be leh bawk ang, ‘vanneihna nen bei zel rawh’ ka ti mai thei a, ‘inremna tur kan siam ta’ tih pawh ka sawi mai thei,” a ti.
Trump-a hian Zelensky-a nen hian thu inhmuh loh an nei tih pawh a sawi a, Ukrainian president thiltihte chu a duh loh zawng a awm tih a sawi a. A hma pawhin February, 2022 atanga Russia-in Ukraine-a beihnaah hian Zelensky-a hi a lo puh tawh bawk.
Nakin zela inbiaknaah chuan Zelensky-a pawh a tel thei dawn tih sawiin kil thum atanga indawrna a la awm thei tih a sawi.
Hetih lai hian Kremlin chuan Zelensky-a tela inbiakna hi an la duh lo va, Putin-a pawhin tun hnai khan Ukrainian president nena inkawm chu a la hla tih a sawi.
Trump-a hian Zirtawpni khan Putin-a nena inbiak tur hi a puang a, a puan ni hi Russia hnena inkahhai puang tura a tih hun tawp ni a ni bawk.
Alaska-a inbiakna tur chungchangah hian Zelensky-a chuan Kyiv tel lova thutlukna siam a nih chuan ‘thutlukna thi’ a nih tur thu a sawi a. Thawhtanni khan Ukraine-a intelligence service chuan Russia chet danah indo titawp tura inbuatsaihna lam a la hawi lo tih an sawi bawk.