Trump-a’n Venezuela-a an inrawlh chhung tur sawi lawk thei lo
US President Donald Trump-a chuan Venezuela-a an ram an inrawlh hun chhung tur chu kum tam tak pawh a ni thei tih a sawi.
New York Times (NYT) hnenah US sipaiten Venezuelan hruaitu, Nicolás Maduro-a Inrinnia an man hnuah a sorkarin South American rama a thunun hun chhung tur chu ‘hunin a la hril ang’ tih a sawi.
Trump-a hian tuna sorkar lailawk hruaitu mektu, Maduro-a lamtang, Delcy Rodríguez-i thlaktu tur zawn nan inthlan an huaihawt dawn em tih leh a hun tur pawh a sawi thei lo.
Hetih lai hian Venezuelan eptu hruaitu, María Corina Machado-i chuan Maduro-a paihthlak tak chu ‘zalen taka’ Venezuela hruaia a awm theihna tura thil inthlak a nih thu a sawi.
NYT-a thawkten an tuialhtheia hausa tak Venezuela ram a sorkarin an thunun zui dan tura ruahmanna a neih an zawt.
Nilaini khan White House chuan US hian tuialhthei hralh chu ‘chiang takin’ an thunun dawn tih an lo sawi tawh.
US Energy Secretary Chris Wright-a chuan Caracas-a sorkar lailawk ding mek karna tha atan US-in Venezuela tuialhthei hralh a thunun chu a tul tih a sawi bawk.
Trump-a chuan a sorkarin khawvela a nei ngah ber ram, Venezuela atangin ‘tuialhthei a la’ dawn tih a sawi a, ‘hun rei lo te chhungin’ oil industry tilianin a enkawl dawn niin a sawi bawk.
Venezuela-in tuialhthei a hralh chhuah zat hi Maduro-a sorkar leh a hmaa miten an enkawl dan a that loh avangin a hniam zawngin a kal nasa a, US-in a hrek vang a ni bawk.
Trump-a chuan NYT hnenah hian US Secretary of State Marco Rubio chu Rodríguez-i nen an inbe reng tih a sawi a. Rodríguez-i hian ‘kan mamawh ang nia a hriatte min pe vek’ tih a sawi.
US president hian a hma khan sorkar lailawk hian tuialhthei an hralhna chu US siam bungrua chauh lei nan hman an lo pawm tawh niin a sawi tawh bawk.
NYT chanchinbu mite hian Trump-a’n Venezuela hruaitu thar atana Rodríguez-i a pawm chhan a chhang lo niin an sawi.
Venezuela chinchang hriate chuan Maduro-a paih thlak a nih khan zawi zawiin eptu hruaitu pahnih, Edmundo González leh María Corina Machado kutah an ram a luh an ring.
Hetih lai hian US-in Machado-a an man hnu lawka thuthar lakhawmtute a kawmnaah Trump-a chuan Rodríguez-i hian ‘zahna’ a hmu tawh lo va, Venezuela hruai turin a thlawp tih a sawi thung.