Trump-a’n Venezuela-in tuialhthei a pek chhuah phalna hlip dawn

Trump-a’n Venezuela-in tuialhthei a pek chhuah phalna hlip dawn
US President Donald Trump chuan an ramin a hrek chunga Venezuela-in a tuialhthei Thenkhat a thawn chhuah a phalsakna (license) chu a hnuk kir dawn tih a sawi.
Sorkar enkawl tuialhthei company leh US oil giant Chevron ten inthlunzawmna an neih, dollar-a sum an lak luh theihna tihtawpsak an ni tur hi Venezuelan sorkar tan chuan thil pawi tak a tling thei dawn.
Trump-a hian Chevron-in Venezuela-a hna an thawh theihna license hi Nicolás Maduro-a sorkarin ‘inthlan fel fai’ a huaihawt theih loh avang leh rang taka ‘tharum hmang chu mi sualte’ US-a a thawn theih loh avangin a titawp dawn tih a sawi a ni.
Venezuela chuan he thutlukna hian a ‘thil a tichhia’ tih sawiin US-a pem lut an tam phah thei dawn niin a sawi.
Trump-a hian a thutlukna hi Truth Social-ah a puang a, ‘mi â tak Joe Biden-a’n November 26, 2022-a Nicolás Maduro, Venezuela hnena ngaihhnathiamna pea tuialhthei inpek tawn theihna tur inremna a siam hi tihtawp a ni ang’ tiin a ziak a ni.
Eng ngaihhnathiamna nge tih chiang takin tar lang lo mah se hemi nia licence pek chhuah chu Venezuela nena insumdawn tawnna tura US treasury-in Chevron hnena ‘tiam chin awma ram leilung hausakna hai chhuak tura beihpui thlak’ phalna pek chiah a awm a ni.
Licence hian Chevron chu Venezuela-a sorkar thunun tuialhthei company, PDVSA nen thawhho a phalsak a; mahse, US company hian ‘Venezuela sorkarah chhiah emaw, royalty emaw a pe tur a ni lo’ tih ziah lan a ni thung.
Chevron thupuangtu, Bill Turenne chuan Nilaini khan thuchhuah a siamah ‘Chevron hian Venezuela-ah hian dan leh phal chin ang zelin hna a thawk a, US-in hrekna a kalpui ang zui zelin thil a ti’ tih a tar lang.
Tun hnaia Financial Times chanchinbuin a kawmnaah Chevron Chief Executive Mike Wirth chuan Chevron hi Venezuela aTanga an chhuak a nih chuan China leh Russia company-ten an luah thuai dawn niin a sawi.
Venezuela economy chu Chevron an chhuah chuan a nghawng na hle dawn a, US-a lut ru an pun phah dawn thu a sawi bawk.
Venezuela-a eptu, license hnuh kir duh thinte erawh chuan Maduro-a sorkar chu ‘sum lamah nunna’ a neih phah zawk dawn niin an sawi.
Licence hi kum 2022 khan Biden-a sorkar chuan Maduro-a sorkarin inthlan fel leh thianghlim a buatsaih dawn nia a intiam angin a pe a ni.
July, 2024 khan Venezuela-a sorkar thawhpui inthlan buaipuitute chuan Maduro-a hi inthlana hnehna changah a puang a; mahse, eptu leh US telin ram dang tam tak chuan a khingpuite zawk chakah an ngai thung.
President Trump-a’n license hi palai a ruat thar, Richard Grenell-a’n Caracas-a Maduro a kawm atanga thla khat tling lovah a titawp.
Grenell-a’n a tlawh tum hian Venezuela-a US khua leh tui tangte chu chhuahtir niin Maduro-a sorkar hian US atanga Venezuelan thawn haw turte phurhna tur thlawhna tirh a tum bawk.