Thah tuma beih a tawh hnua rally a neih hmasak berah Donald Trump chuan democracy tana mi hlauhawm nia an puhna chu hnawlin, “Kar kalta khan democracy vangin silaia kah ka ni,” tiin a sawi.
“Extremist ka ni lo hrim hrim” tiin swing state Michigan a rally a neihnaah a sawi zui bawk.
A elpui ber Democratic Party te, President Joe Biden chu presidential race atanga inhnukdawk tura nawr mek te chu a nuihsawh zui bawk a.
“Tu nge an candidate pawh an hrechiang lo. Tu emaw a inlan a, vote a hmu a, tunah chu chu laksak leh an tum a, chu chu democracy chu a ni,” tiin Trump chuan a sawi bawk.
Republican presidential nominee chuan Pennsylvania-a kum 20 mi leka upain thah tuma a beih avanga a beng dinglam a kahsakna tuamna bandage pawh te zawk a inbel tawh bawk a.
Michigan-a Grand Rapids a Van Andel Arena a punkhawmnaah a hma lawka Pennsylvania rally-a Secret Service te chetchhiatna avang khan venhimna uluk leh khauh taka kalpui a ni.
Hetih lai hian Biden loyalists te chuan president Biden chu bansan tura an nawrnaah an tuang an tichhah reng thung a. Kum 81-a upa ni tawh Biden chuan presidential race-ah a la tel zel thu a sawi tlat bawk.
Chutih rualin Biden chuan presidential race atanga inhnuhdawh a tum a nih chuan amah thlak thei ber tura ngaih chu vice president Kamala Harris a nia ngaih a ni a.
Senator Elizabeth Warren, kum 2020 a presidential race-a tel chuan President Biden chu a thlawp thu a sawi a. “Joe Biden hi kan nominee a ni. Thutlukna lian tak siam tur a nei,” tiin a sawi a.
“Tuna beiseina ka neih chu President Biden-an inhnuhdawh a tum a nih chuan Vice President Kamala Harris, party lungrualna siama Donald Trump hmachhawna November inthlana chakna chang thei tur kan nei a ni,” tiin a sawi.
Mahse Democrats thenkhatte chuan hun tepter tawh taka presidential nominee thlak chuan inthlanah chakna a chantir loh an hlauthawng zawk thung.
Chutih laiin Trump-a team lam chu Trump-a thah tuma beihna thlengah mipui nawlpui thlawpna an hmuh leh thla kaltaa debate neiha Biden chet chhiat em emna avangin an phur hle thung.
“Pathian ka lamah a tang a ni” tiin Trump chuan kar kalta Ningani khan Republican National Convention neihnaah a sawi a, Republican party lungrual taka siam bawkin an phur hle bawk.
“Pathian engkim tithei vang liau liauin in hmaah ka ding thei a ni,” tia sawiin thah tuma beih a nihnaah Pathian vang chauha him a nih thu a sawi zui a.
Donald Trump chuan a tum khat nan a running mate J.D. Vance nen debut campaign an nei bawk a. Ohio senator kum 39 leka upa Vance hian swing state Michigan, Pennsylvania leh Wisonsin ah te vote a hui teuh theih beisei a ni.
Trump dinhmun tha zel
Get real time updates directly on you device, subscribe now.
Prev Post
Next Post