Trump leh Xi an inbia, president-in Beijing tlawh a tum

Trump leh Xi an inbia, president-in Beijing tlawh a tum
Donald Trump-a chuan Xi Jinping-a nen phone-a an inbiak hnuah China a tlawh dawn tih a sawi.
US president hian ‘tha taka an inbiak’ hnuah White House tlawh turin a sawm let tih a sawi a, a zin tur a sawi hi ram pahnih hian an la puang lo ve ve thung.
Ningania an inbiak hi February thla atanga Trump-a’n Beijing laka sumdawnnaa indona a puan hnua an inbiakna hmasa ber a ni a. Chinese sorkar chanchinbu chuan White House-in a dil angin inbiak a ni tih a tar lang.
Trump-a hian darkar khat leh a chanve an inbiaknaah hian sumdawnna chu an sawi lian ber a nih thu ‘ram pahnih tana tha ve ve tur rah a chhuah’ tih social media-ah a tar lang.
“China tlawh turin min sawm a, kei pawhin lo zin turin ka sawm,” tiin Trump-a chuan sawiin Xi-a nen an inbiak lai hian German Chancellor Friedrich Merz-a nen Oval Office-ah an inkawm tih a sawi bawk.
“Kan pawm ve ve a, first lady nen kan zin ang a, ani pawh Chinese first lady nen an lo zin ang,” a ti.
Chinese pawhin an sawm thu hi an sawi a, White House-a zin let ve chungchang erawh an tar lang lo.
Chinese sorkar news agency Xinhua chuan Xi-a hian Trump-a hnenah hian US-in ‘China dova a tha lo zawnga hrekna a kalpui chu a hnuhkir ngei a ngaih thu’ a hrilh niin an tar lang.
Chinese hruaitu hian Trump-a hnenah hian China chuan a intiamna a vawn tlat thu leh an pahniha inhriat thiam tawnna an neih atangin an la kalsawn lo tih a hrilh a. Hei hi Geneva-a ram pahnihten tun hnaia inremna an siam a sawina a ni.
Ram pahnihte hian an inremna hi bawhchhiaah an inpuh ve ve.
Trump-a hian ram tam tak atanga bungrua an lak luha chhiah an chawitir thin (tariff) a tisang vak a, China phei chu a tisang zual a. Beijing pawhin US atanga a lak luha chhiah a lak a tisang zui ve a, a inep tawn nasat lai phei chuan tariff hi 145% zetin an tisang hman.
May-a an indawrnaah US hian Chinese bungruaa tariff a lak chu 30%-in a tihniam leh a, Beijing pawhin 10%-a tihniam vein leilung hausakna thil pawimawh bika chhiah lak loh vek a tiam bawk.
He inremna hi ni 90 chhung atana an tih niin hemi hun chhung hian sumdawnnaah inremna siam an tum.
Hetih lai hian tun thlengin indawrna mumal an nei zui thei lo va, inpuh chhiatna hrang hrang an nei zui zawk.
US chuan China hian leilung thil bik leh car leh computer industry-te hman tur magnet vâng chi bik a thawn chhunzawm duh lo niin a sawi a. Chinese Ministry of Commerce chuan phain US chu computer chip-ah khuahkhirhna thar siamah a puh let.
Trump-a hian semiconductor design software thawn chhuahah khuahkhirhna thar siamin Chinese zirlaite visa a tihtawpsak bawk.
An inbiak zawh hnuah erawh White House-a thuthar lakhawmtute a kawmnaah, “Chinese zirlaite an lo kal thei, engmah harsatna a awm lo; mahse, kan lo endik ang,” a ti.
Trump-a leh Xi-a inbiakna hi ram lian hruaitu lawkte an ngawih reng hnua miin an nghahhlelh a ni.