Tsitsipas a tla nghal ringawt

Australian Open khelh mekah a ni hnihnaah inlehthalna lian a thleng nghal a, champion tura rinkai zinga mi Stefanos Tsitsipas chu first round pal tlang zo lovin a tla nghal ringawt. Tsitsipas rual hian player langsar zinga mi Nick Kyrgios pawh a tla nghal a. Hetihlai hian British No. 1 Jack Draper chuan harsa takin hnehna a chang ve thung.
Australian Open 2023-ah final hial lo thleng tawh Stefanos Tsitsipas hian American Alex Michelsen hmachhawnin bul a tan a, hnehna chang ngei tura beisei ni mah se mak tak maiin inlehthalna lian a thleng tlat thung. World No. 41 Michelsen hian seed no 11 Tsitsipas lakah beisei phak baka thain bul a tan a, set khatnaah game nga lai hloh bawk mah se break pawimawh tak a neih vangin set la hmasa zawkah a tang. Harsa taka set khatna a lak hnuin set hnihnaah a khel tha zui viau a, game thum chauh hloh chungin set a la zui leh a, player langsar lakah 2-0 in hma a hruai der.
Dinhmun derthawng taka a din hnuin Tsitsipas a insiamtha a, set thumnaah game hnih chauh hlohin set a la ve leh ta mai a, chak beiseina thar a nei. A khingpui lehthal ngei tumin tan khawh bawk mah se Tsitsipas hian set linaah a uiawm takin a serve a hum zo lo. Harsa taka set a lak belh leh vangin Michelsen chuan 7-5 6-3 2-6 6-4 in hnehna a chang a, inlehthalna lian a thlen tir.
Thawhtanni a inkhel dangah Australia player langsar Nick Kyrgios chuan hnehna a chang zo lova, first round paltlang zo lovin a tla ve bawk. Wimbledon final pawh lo khel tawh Kyrgios hi hliamin a tibuai a, tun hi kum 2022 hnu lamah Australian Open a hmachhawn lehna hmasa ber a ni. An ramin inelna lian a thlenaah hian chet that tum viau mah se a khingpui British player hmasawn chak tak Jacob Fearnley lakah a chak zo lo a, a beiseina a tham ral. Inkhel hmuhnawm takah kum 23 mi Fearnley hian 7-6 (7-3) 6-3 7-6 (7-2) in hnehna a chang a, second round a inhlangkai.
Inkhel hmuhnawm takah British rawlthar Fearnley-a’n hnehna a chan rual hian British mipa No. 1 Jack Draper chuan harsa takin hnehna a chang ve thung. Draper hian Clay court lama player tha tak Mariano Navone a hmachhawn a, set hloh hmasa zawkah a tang. Set khatna a hloh hnuin a insiamtha a, set hnihnaah goal thum hloh chungin set a la. Set khat ve ve an lak hnuin Argentine Navone chuan set ala nawn leh a, 2-1 in hma a hruai. Dinhmun derthawng taka a din hnuin Draper hi huaisen takin a inlan a, set hnih la zawnin a khingpui lakah hian 4-6 6-3 3-6 6-3 6-2 in hnehna a chang zui ta a ni.
Thawhtanni a inkhel ngaihven hlawh takah champion lai Jannik Sinner chuan Nicolas Jarry chu 7-6 (7-2) 7-6 (7-5) 6-1 in a hneh a, a trophy kawl mek humhim turin hma lam a pan ve bawk.