Tu tan pawh MP thawh pui theih nih ka tum ang – K Vanlalvena

MP atana a tlin a nih chuan, ruling party tan pawh an MP candidate aiin a tangkai daih zawk maithei tih MP candidate K Vanlalvena chuan a sawi a, tu tan pawha MP thawhpui theih nih a tum tih a sawi.
Thawhtannia MNF office, Mizo Hnam Runa inkhawmah K Vanlalvena chuan Lok Sabha MP atan a tling a nih a, ruling party-in an thawhpui duh phawt chuan an MP candidate ai hian a tangkai daih zawk maithei tih sawiin, tu tan pawha MP thawhpui theih nih a tum thu a sawi.
Mizo thalai eizawnna mumal nei lo thahnem tak awmte tan theihtawp chhuaha hma lak a tum tih a sawi a. “Mizo thalai sports, music, art leh thil hrang hranga talent tha tak tak neite hian an talent hmanga ei an zawn theih dan tur theihtawpa dap pui ka tum. Zofa hmun hrang hranga thendarha awm mekte inpumkhatna turin theihtawp ka chhuah zui zel dawn a. Zofa hmun hrang hranga awmte tana MP nih ka tum a ni,” a ti.
Mipui zawng zawng vote thlak theuh turin a sawm tih K Vanlalvena hian a sawi a. Amah vote lo tur pawhin vote thlak vek se a duh tih sawiin, democracy ram kan nih angin chu chu a hlu hle tih a sawi. “Huatna, khaknate tel loin rilru thianghlim takin tawngtaina nen campaign zel ang u,” a ti bawk.