TU TUTE HIAN NGE LAL DAWL ANG LE ?

H Lalchhuanliana
A rei tawh deuha a kum ka hre chiang ta mai lo, MLA inthlan result hi chanchinbua mi kan lo en ho laih laih a. Chutih lai tak chuan Rev LZ Zolawma (RIP) zing leng haw khan result chu a rawn en ve a. Chumi tuma a thu sawi, “Heng ho zingah hian tu tute hian nge lal dawl ang le” a tih kha vawiin thleng hian ka rilruah a la cham reng thin. A thu sawi hi a sei lo nain thuchah pawimawh leh thuk tak niin ka hria a, mi zawng zawng huapa thuchah pawh lo ni teh se. Mihring nihphungah hian lalna leh thuneihnate hi mitin duhthusam a niin politics-ah phei chuan a chuha an inchuh a ni a. Lalna leh thuneihna han chan chiah hian mihring mizia hi a lo inthlak fo thin a, mizo upate pawhin “Lal ngai lo lal a na, an lal a kha” an lo ti hial reng a ni. Kan pastor zahawm tak pawh khan kan ram rorelna kalphung leh roreltute rorel dante, thuneihna an chan hnua an lo kal dik loh thin dante a hre chiang ni ngeiin a rin zawn theih a ni. “Lal dawl” tih a hman hi thuneihna hmang dik leh hlemhle lo sawina a ni ngei ang. Lal dawl leh dawl lo an awm thin avanga he thu hi sawi ni ngeiin a lang a ni .
Ram roreltu, sawrkar hna lian thawkte leh thil tithei dinhmuna han din hian mi thenkhat hi chu rilru leh nungchang dang ta daih hi an awm fo thin. An dinhmun tha leh an thuneihna chu hmang sualin, midang chanai leh hamthatna thlenga laksak ching an awm thin a, hei hi thuneihna hman sualna, lal dawl lohna leh Corruption kan tih hi a ni. Hruaitu fel tak tak awm zingah hetiang lal dawl lote hian ram hmasawnna an dal a, mizo hnam an tihmingchhia a, hetiang mite hi ram leh hnam hmelma an ni tih kan pawm tur a ni ang. Ngun taka zu ngaihtuah phei chuan heng lal dawl lote hi kristian an niin kristian sakhua pawh an tihmingchhe tel bawk a, a pawi hle a ni. Hetiang ang kan ram hmelma dotu tur chu ram neitu mipuite kan ni a, dikna leh rinawmna nen kan do tlat tur a ni ang. Mipuite ralthuam tha leh pawimawh tak chu inthlan huna kan Vote hi a ni a, hei hian awmzia pawh a nei thui hle thin a ni.
Heng bakah hian rinawm tur leh Corruption that lohzia hi ni tin Sikul bakah naupang Sande Sikul atanga kan zir tan a hun tawh hle a ni. Mihring rilru siam tha tur (Moral reform) chuan naupang zawkte rilruah thu tha kan tuh anga, chu chu an lo thanlenpuiin an nunpui dawn a ni. Kan ram thalaite sal bettu ruih theih thil leh sualna hrang hrang bul hi Corruption a ni mai lo maw, ngaihtuah tham tak a ni awm e. Political party ruihchilh ve lo, ram hruaitute nungchang leh ram an hruai dan ngun taka lo ngaihven thin hi mi tam tak an awm tih hi, politician-te hian hre reng se a finthlak hle ang. Kan ram politics a lo thianghlim zawk nan kan Kohhran hruaitute, MPF te leh tlawmngai pawl hrang hrang thurawnte hi kan politician-te hian lo zawm thin se, hma kan sawn ve zel mai ang.
Kan ram tana theihtawp lo chhuahtu hruaitu hmasate an fakawm hle mai a, vawiina kan dinhmun min thlentute an ni, i fak ang u. Hetih lai hian kan hruaitu thenkhat, mipui nawlpui pawhin Corrupt nia kan hriat tlan thup leh kan ngaihdam theih loh an awm ve thung a, i dem thung ang u. Sum lak luh leh khawsak dan inmil lo lutuka hausate hi chu mi tu pawh ni se kan hnawla, kan ngaihsan loh ngam tak tak a hun hle tawh a ni. Kan State hi India rama ziak leh chhiar thiam zaa za ni hmasa ber kan ni a, kan thalai lehkha thiam rualte hi ram leh hnam hmangaihna rilru puin kan ram tan lo pen chhuak teh u.
Dik taka sawi chuan kan politician thenkhatte hi chu kan ram hruai tura thangtharten in iai leh hnawl rilrukte kha an ni fur tawha, in rawn thlak an hun tawh hle a ni. Ram tana ruahmanna tha nei si lo, mahni tana duham thiam takte hi chu lo chawl tawh se la, ram hmangaihtu hmel tharin rawn thlak an hun tawh hle a ni. Ram hruaitu hmasate an liam zel a, hruaitu tharte hian rinawmna leh taimakna nen an sulhnu tha chhunzawm chungin hma rawn la ula, “Lal dawl ram roreltu” rawn ni ngei teh u le.