Mahmuaka Chhakchhuak
-- Advertisement --
C. Lalawmpuia Vanchiau @Opa Vanchiau ziak lehkhabu hming danglam tak mai TUALCHHER CRITICISM bu chu April 26, 2024 niah khan tlangzarh a ni ta a. He lehkhabu hi ka chhiar hma hauh atang pawha chhiar chaka ka nghahhlelh a niin tlangzarh hma leh hnuah pawh Lunglei Synod Bookroom-a a awm leh awm loh zawt ngun ber ka nih ngei pawh ka inring hial.
Tichuan, May 4, 2024 (Inrinni) ah khan Lunglei atangin Aizawlah rawn pheiin thil pawimawh chi hrang hrang buaipuiin May 9, 2024 thleng kha thildang ngaihtuah thei miah loin ka buai a. Lehkhabu lam ngaihtuah hmana ka awm loh avangin zan muthmunah phei chuan ngaihtuahna a vir kual muai muai reng mai a. May 10-ah erawh hma taka chhuakin ka hnaih ber Khatla Bookroom chu zinglam dar sawm velah hian ka thleng a, kawngka luh rual rualin ka zawt nghal a, a awmna hmun min kawhhmuhna lam ka pan chuan ka hmuin ka la a, ka chhuak lehnghal mai a. Ka kalna apiangah ka keng a, ka hunawl hlekah chuan ka chhiar zel a, a bu kawm hrim hrim pawh hian mit a lak avangin a hma lam leh hnung lam pawh ka bih ngun hle bawk. A bu hming ber hi mawi ka ti a, TUALCHHER tih hi sawifiah hran leh pawh ngai chuang loin mizo thinlungah chuan a fiah nghal em em mai laia CRITICISM nena a han kaihkawp kher erawh sawifiah ngai a ni thung awm e.
Criticism tih chu critic tih atanga rawn kal niin mi kutchhuak that leh that loh endik or endiktu, sawiseltu tiin JF Dictionary chuan a awmzia min hrilh a. Criticism tih hrim hrim hi khawvel hian a hmelhriatna a rei tawh hle mai a, Plato leh Aristotle hunlai pawh khan an lo hmelhriat tawh hlein renaissance hun lai khan Leonardo da Vinci leh Michelangelo te pawh khan an lo uar viau tawh bawk. Kum zabi 18-na lai vela enlightenment hun lai pawh khan literature, philosophy leh politics lamah pawh critic rawngkai lam hi hmuh tur a awm fo tawh bawk a. Kum zabi 19-na leh zabi 20-naah phei chuan critical theory hrang hrang; formalism, Marxism, psychoanalysis, structuralism leh post-structuralism te pawh a lo piang chhuak hial a nih kha. Chipchiar zawka sawi chuan literary criticism tichhuaktu (Father of criticism) chu Aristotle (384-322BC) niin ani hian midang tam tak zirtir chhawng zelin Alexander the Great ngei pawh hi a zirtir chhuak a ni.
A ziaktu Opa Vanchiau hi mi namai a ni lo a, a hmel en reng reng pawhin a thluak a tha tih a chiang rengin ko thut pawh ni ila darkar hnih thu sawi tur a nei sa hrim hrim ang tih tur ang chi niin a ngaihtuahna hi a hmang nasa tih pawh a hriat sa reng mai a. A tuizawng (ni tura ka ngaih ngawt) lah hi a tunlai lo ang reng viau thinin Rambuai literature a buaipui atang reng khan nula thinlung kuai zawng lam hi a tuipui vak lo em ni tih tur hi niin a thuziak reng rengah hian nuihna tur lam thu hi hmuh tur a vang thin hle. Tualchher Criticism ngei pawh hi mi tam tak tan chuan tuipui harsa tak tur a ni mai thei nain a tuite tan erawh chuan he lehkhabu phek 272 leka chhah hi an lem duak duak ngeiin a rinawm a, an khawpkham lo ngei bawkin ka ring zui a, ka thinlung ang pumi tan phei chuan Opa Vanchiau hi ngaihsan loh a har an ti ve ngawtin a rinawm.
Opa Vanchiau hi he lehkhabu ka chhiar atang hian ka tluk lohzia ka hmu a, ngaihsan loh har ka ti ngang mai. Nang ngei pawh khan he lehkhabu hi i han chhiar ve ang a, phek hmasa ber atangin Opa Vanchiau hi mi namai a nih lohzia i hmuh ve ngei a rinawm. Phek 9-na atang hian a tawp thlengin thutakin a khat vek a, thu bengvarthlak tak tak hlir a bilhin chhiar hahdam takin a tawp thlengin a ziak tluan thei hi ka dah chungnunna pakhat a ni. A pahnihnaah chuan a thuziak phek tinah hian lehkhabu dang hming leh phek number hi a dah tel zel hian a lehkhabu chhiar taimakzia a hriat a, lehkhabu hi chhiar ve nualin ka inhre nain he lehkhabu ka chhiar atang hian ka la chhiar tlemzia ka hriatchhuah phah a, lehkha chhiar tam kutchhuak nge nge chu alo danglam bik hle mai tih ka hriatin Opa Vanchiau hi ka dah chungnung lo thei lo.
Tualchher Criticism-ah hian a ziaktu thinlung puthmang pawh hriatthiam theih turin a lang a. A thuziak reng reng hi kimchang taka ziakin leh fiah felfai taka ziakin pehhel leh thup pawh nei chuang loin midang zawng zawng pawh a hmu rual vek bawk a. Criticism lam hawi a nih ang ngeiin tawngkam pawh a then laiah chuan a khal mah mah deuh em aw tih tur a awm zauh zauh bawk. Nimahsela a ziaktu hi demna tur a awm hauh chuang lo a, sawiselna tur a awm hek lo. A bu kawm hnungah hian A rilrua a vawn leh veite a sawi chhuak ngam lo a nih chuan writer pawh inti ngam tur ka ni lo ang a, nawhchizuar ka nih loh veka leh, uire ka ni ang a inti mai reng a. Hawl ngam loh a nei lo a, hawl phak loh lah a nei hek lo. A rilrem zawng a fak thiam a, a rilrem loh zawng erawh a hlahthlem khat hle tiin tu emaw chungchang chu fiah takin min hrilh tlat a ni.
Thu leh hla lama mitkeu tan leh khaw eng hmu tawh tan chuan he lehkhabu hi chhiar makmawh niin a hriat a, thupui 16 chhungah hian thu ngaihnawm a ziak a ni mai lo a, thu bengvarthlak leh ngaihhlut tlak tur thu tha tak tak a ziak a. Chung thute chu hmanhmawhna nei miah loa zawi muanga chhiar chi niin phek tinah hian underline tur a awm thluahin Opa Vanchiau lo thukzia pawh bung tinah hian hmuh theihin a awm. Thupui 16 chhunga thute hi tute emawin an lo ziak tawh alawm tih tur pakhatmah ka hmu lo a, a thupui hmingte lah a danglam narawh e; Keivomesque tihte, Utopian Rokunga Dystopia han tihte leh Aukhawk Lasi Thangkhawk han tihte phei hi chu midangin an la sawi ve ngai hauh lohte an ni hial awm e. A bu hmelhmang a danglam ang bawkin a bu chhung thute pawh min khawih danglam theite an nih hlawm vek avang hian chhiar tui laklawh a awl a, chhiar laiin lehkhabu dang min keu tirin a ziah bak thu min ngaihtuahtir thei zel bawk hi Vanchiauism kan ti ve mai dawn nge ni le?