SASCI sum debate..!

SASCI sum chungchanga thu inchuhna chuan a tawpah ‘debate-a inchona’ a hring chhuak ta liau mai le!
ZPM leh MNF party te chuan SASCI sum chungchangah dik zawk anga insawi ve vein, a lehlam dik lo zawkah an inpuh tawn a. ZPM lamin media hmaa ‘common platform’ hmanga sawihona nei turin an cho a; MNF lam pawhin hei hi chhang let nghal vatin sawiho ngei tha an tih thu leh; mahse, a sawihona hmun turah assembly house chhung ngei ni se an duh tih sawiin special assembly session pawh tun thla May chhunga ko turin an cho let ve thung a.
Mipui tan chuan a hrilhhaithlak tulh tulh a tih theih awm e. A chhan pawh, media hmaa common platform-ah debate lo nei tehreng pawh ni se, thiam zawk leh thiam lo zawk hriat theih chuang lohvin mipui ngaihdanah tho a innghat liam leh mai dawn tihna a ni. A endiktu awm pawh ni se, endikna result-ah inhnialna a chhuak zui leh dawn tho a, public debate atangin dik zawk leh dik lo zawk a chhuak chuangin a rinawm loh a ni.
Tuna SASCI sum hi a lapse a nih pawhin a lapse dan leh a lapse hun hi record en letin a hriat theih tura ngaih a ni a. Hetah hian sawrkar hmasa leh sawrkar hnuhnung kutthlakna chin pawh hai rual lohvin a lang vek dawn a. SASCI sum kal kual dan hi record a lo awm mumal lo a nih phei chuan tunge record fel lo tih pawh file atangin a lang vek tur a ni. Chutiang pawh chhui let theih loha record a fel lo a nih lehzel phei chuan, a tu zawk sawrkar hun laia thil thleng nge tih a la hriat theih tur a ni. Hetiang em em pawh chhui leta hriat fiah theih loh tura sawrkarin file a vawng tha lo a nih chuan, mipui tan chuan a beidawnthlak thuahhnih hle dawn tihna a ni.
Chuvangin, press conference hmangin an dinhmun leh thil awm dan an sawi ve ve tawh a, tunge dik lo zawk tih chu debate buai ngai lovin SASCI sum kalkawng hi chhui let zar zar mai tur a ni a, chuta tang chuan engkim a fiah vek thei tura ngaih a ni.
Sum thawhchhuah kan neih tlem avanga budget pawh lian ve thei lo kan nih tawh mek laia sawrkar laipui scheme hrang hrang atanga hmasawnna hnathawhna tur sum kan hmuh chhun ang ang pawh a nihna tur anga kan hmang tangkai thei lo thin hi a pawi takzet a, ram leh hnam hmangaihna thinlung tak tak pu chunga ram kan enkawl thiam hi a hun takzet ta!